Ўзбекистонда хавфли чиқиндиларни семент печларида қайта ишлаш таклиф қилинмоқда – лойиҳа қиймати 3,9 млн евро
ФАО маълумотларига кўра, Ўзбекистонда хавфли чиқиндиларни йўқ қилиш имкониятлари чеклангани атроф-муҳит ва аҳоли саломатлиги учун хавф туғдиради. Шу сабабли халқаро ташкилотлар хавфли чиқиндиларни семент печларида қайта ишлашни таклиф қилмоқда. Лойиҳа Европа Иттифоқи томонидан молиялаштирилади ва унинг умумий қиймати 3,9 млн еврони ташкил этади.
Ўзбекистонда хавфли чиқиндиларни семент печларида қайта ишлаш таклиф этилмоқда — лойиҳа қиймати 3,9 млн евро
БМТнинг Озиқ-овқат ва қишлоқ хўжалиги ташкилоти (ФАО) ҳамда Чиқиндиларни бошқариш ва сиркуляр иқтисодиётни ривожлантириш агентлиги Тошкентда хавфли чиқиндиларни экологик жиҳатдан мақбул бошқариш масаласига бағишланган давра суҳбатини ташкил этди.
Тадбирда халқаро ташкилотлар, ривожланиш ҳамкорлари, давлат идоралари, Ўзбекистон семент ишлаб чиқарувчилар уюшмаси ва семент заводлари вакиллари иштирок этди — унда айрим турдаги хавфли чиқиндиларни семент ишлаб чиқариш жараёнида муқобил ёқилғи ва хомашё сифатида биргаликда қайта ишлаш имкониятлари муҳокама қилинди.
Семент печларида чиқиндиларни биргаликда қайта ишлаш (со-просессинг) айрим мамлакатларда хавфли чиқиндиларни бошқариш усулларидан бири сифатида қўлланади. Бунда чиқиндилар семент ишлаб чиқариш жараёнида ёқилғи ёки хомашёнинг муқобили сифатида ишлатилиши мумкин.
ФАО маълумотларига кўра, Ўзбекистонда хавфли чиқиндиларни йўқ қилиш имкониятларининг чеклангани атроф-муҳит ва аҳоли саломатлиги учун хавф туғдиради. Шу сабабли семент саноатининг ушбу йўналишдаги салоҳиятини ўрганиш масаласи кун тартибига чиқарилган.
Давра суҳбатида ФАО кўмагида Озарбойжонда доимий органик ифлослантирувчи моддаларни ўз ичига олган пестицид чиқиндиларини назорат остида биргаликда қайта ишлаш бўйича ўтказилган синов тажрибаси ҳам тақдим этилди.
Шунингдек, Ўзбекистон семент ишлаб чиқарувчилар уюшмасининг чиқиндиларни биргаликда қайта ишлашга бизнес ва инвестиция қарори сифатида ёндашуви муҳокама қилинди.
Тадбир якунида пилот лойиҳаларни амалга ошириш учун ҳал қилиниши лозим бўлган дастлабки тартибга солиш, рухсат бериш, инфратузилма ва инвестиция масалалари белгилаб олинди.
Европа Иттифоқининг Ўзбекистондаги делегацияси дастур менежери Роберто Апарисионинг таъкидлашича, кейинги босқичда муҳокамаларни давлат идоралари ва саноат вакиллари билан келишилган йўл харитасига айлантириш муҳим.