Ўзбекистонда мактаб дарсликлари янгиланади ва дуал таълим кенгайтирилади
Ўзбекистон Президенти Шавкат Мирзиёев 28 сентябрь куни мактаб ва олий таълимни ислоҳ қилиш бўйича тақдимотлар билан танишди. Учрашувда дарсликларни янгилаш, дуал таълимни ривожлантириш ва Ляонин педагогика университетининг Ўзбекистондаги филиали фаолияти кўриб чиқилди. Амалдаги дарсликлар таҳлили давомида 260 та нашрда 1 257 та хато, яна 51 та дарсликда эса 464 та таржима хатоси аниқланди. Шунингдек, номувофиқлик ҳолатлари ҳам қайд этилди […]
Ўзбекистонда мактаб дарсликлари янгиланади ва дуал таълим кенгайтирилади
28 сентябрь куни Ўзбекистон президенти Шавкат Мирзиёев мактаб ва олий таълимни ислоҳ қилишга бағишланган тақдимотлар билан танишди. Муҳокамалар марказида дарсликларни янгилаш, дуал таълимни ривожлантириш ва Ўзбекистонда Ляонин педагогика университети филиали фаолиятини йўлга қўйиш масалалари бўлди.
Амалдаги дарсликлар таҳлил қилинганда, 260 та нашрда 1 257 та хато, яна 51 та дарсликда эса 464 та таржима хатоси аниқланди. Бундан ташқари, материалларнинг ўқувчилар ёшига мос келмаслиги, шунингдек, механик ёдлашга ҳаддан ташқари урғу берилган ҳолатлар қайд этилди.
Янги ўқув материаллари халқаро тажрибани ҳисобга олган ҳолда яратилмоқда. Бошланғич синфлар учун дарсликлар Финляндия таълим альянси сертификатидан ўтди, 5–7-синфлар учун математика, физика, кимё ва биология фанларидан материаллар эса Сингапур дарсликлари асосида ишлаб чиқилмоқда.
2027 йилгача 1 342 номдаги дарслик ва ўқув-методик материаллар тайёрлаш режалаштирилган.
Янгиланган дарсликларда танқидий ва ижодий фикрлаш, мулоқот, жамоада ишлаш ва билимларни амалиётда қўллаш кўникмаларини ривожлантиришга қаратилган топшириқлар кўзда тутилган. Ўқув материалларига, шунингдек, касбга йўналтириш, молиявий, рақамли ва экологик саводхонлик мавзулари ҳам киритилган.
Ўқитувчиларни тайёрлашга алоҳида эътибор қаратилди. Бошланғич синфларнинг 110 минг нафар педагоги малака оширди. Сингапурлик мутахассислар иштирокида 121 нафар мастер-тренер ва 739 нафар устоз-ўқитувчи тайёрланди, улар яна 90 минг нафар педагогга таълим берди.
Учрашувда, шунингдек, олий ўқув юртидаги таълимни корхоналардаги амалиёт билан бирлаштиришни назарда тутувчи дуал таълимни кенгайтириш масаласи ҳам муҳокама қилинди.
Ушбу тизим билан учинчи ва тўртинчи курс талабаларининг камида 80 фоизини — қарийб 185 минг нафар ёшни қамраб олиш вазифаси қўйилди.
2027/2028 ўқув йилида дастурга 75 та ОТМ ва 3,5 мингта корхонани жалб этиш режалаштирилмоқда. 12,5 минг нафар талаба амалий таълим олиши мумкин бўлади.
Устувор йўналишлар сифатида муҳандислик, ишлаб чиқариш, қурилиш ва қишлоқ хўжалиги тилга олинди.
Амалдаги тизимнинг мисолларидан бири сифатида Андижон вилояти тажрибаси тақдим этилди, у ерда 11 мингга яқин талаба 2 мингта корхонада амалиёт ўтамоқда.
Кадрлар тайёрлашда иштирок этаётган корхоналарга бир қатор қўллаб-қувватлаш чораларини тақдим этиш таклиф этилмоқда, жумладан, талабалар иш ҳақининг 50 фоизини субсидиялаш, божхона тўловлари ва амортизация бўйича имтиёзлар, шунингдек, давлат харидларида преференциялар бериш кўзда тутилган.
Хива шаҳрида Ляонин педагогика университети филиали фаолиятини ташкил этиш масаласи алоҳида кўриб чиқилди.
Филиалда хитой тилини халқаро ўқитиш, халқаро бизнес, туризм соҳасида бошқарув ва сунъий интеллект йўналишлари бўйича дастурларни очиш режалаштирилган. Таълим ўзбек, хитой ва инглиз тилларида олиб борилади.
Талабаларнинг илк қабули 2026/2027 ўқув йилига мўлжалланган. Битирувчиларга Ўзбекистон ва Хитойда тан олинадиган дипломлар берилади.
Президент кадрлар тайёрлаш сифатини таъминлаш, дуал таълимни ҳудудлардаги корхоналарнинг реал эҳтиёжлари билан боғлаш ва Хитой университети филиалига талабалар қабулини пухта ташкил этиш бўйича топшириқлар берди.