Ўзбекистонда кўкрак бези саратони профилактикаси ойлиги – "Пушти октябрь" бошланди

Ўзбекистонда «Пушти октябрь» — кўкрак бези саратони профилактикаси ойлиги бошланди

Ўзбекистонда кўкрак бези саратони профилактикаси ва уни эрта аниқлашга бағишланган ойликка старт берилди. Жаҳон соғлиқни сақлаш ташкилоти маълумотларига кўра, дунёда ҳар йили қарийб 2,4 миллион аёлга «кўкрак бези саратони» ташхиси қўйилади. Агар ушбу тенденция сақланиб қолса, 2050 йилга бориб касалланиш ҳолатлари сони 38 фоизга, ўлим кўрсаткичи эса 68 фоизга ошиши мумкин.

«Пушти октябрь» 1993 йилдан буён дунёнинг кўплаб мамлакатларида ўтказиб келинмоқда. Унинг вазифаси — аёлларнинг профилактика, эрта ташхис қўйиш имкониятлари ҳақидаги хабардорлигини ошириш ҳамда даволанаётганларни қўллаб-қувватлашдан иборат.

Ўзбекистонда кўкрак бези саратони ҳамон аёллар ўртасида энг кенг тарқалган онкологик касаллик бўлиб қолмоқда. Сўнгги йилларда ташхис қўйиш ва даволаш самарадорлигини ошириш борасида жиддий қадамлар ташланмоқда. 2025–2030 йилларга мўлжалланган бачадон бўйни ва кўкрак бези саратонини назорат қилиш давлат дастури қабул қилинди. У скринингларни кенгайтириш, маммографияни ривожлантириш ва ўз вақтида даволаниш учун шароитлар яратишни назарда тутади.

Ҳар йили 45 ёшдан 65 ёшгача бўлган 1,5 миллионга яқин аёлни маммография билан қамраб олиш режалаштирилган. Поликлиникаларда махсус онконазорат хоналари очилган, мобил ва стационар маммографлар эса икки сменада ишламоқда.

Жорий акция доирасида спорт ва маърифий тадбирлар: оммавий югуриш, беморлар ва уларнинг яқинлари учун йога машғулотлари, бепул маслаҳатлар ва кўриклар ўтказилади. Тошкент, Самарқанд, Фарғона ва бошқа ҳудудларда шифокорлар учун профилактика ва беморлар билан ишлаш бўйича маҳорат дарслари ташкил этилади.

14 октябрь куни мутахассислар, ҳамкор ташкилотлар ва халқаро экспертлар иштирокида конференция бўлиб ўтади. Акция доирасида soglomoktabr.cancercenter.uz сайти ишга туширилди, унда ўзбек, рус ва инглиз тилларида касаллик белгилари, ташхис қўйиш ҳақида маълумот олиш ва шифокор қабулига ёзилиш мумкин.

Шифокорлар аёлларни тадбирларда фаол иштирок этишга ва ўз соғлиқларига эътиборли бўлишга чақиради. Бундан ташқари, Ўзбекистонда беморни саратонга қарши курашнинг барча босқичларида — эрта аниқлашдан бошлаб, даволаш ва кейинги кузатувгача ҳамроҳлик қилувчи ягона рақамли тизим яратилади.