Ўзбекистонда капитал бозорини ривожлантиришнинг янги қоидалари муҳокама қилинди
Тошкентда «Капитал бозори тўғрисида»ги қонун лойиҳасига бағишланган халқаро давра суҳбати бўлиб ўтди. Ҳужжат бозорни жадал ривожлантириш ва унинг халқаро молия тизимига интеграциялашуви учун замонавий ҳуқуқий ва институционал базани яратишга қаратилган. 5 октябрь куни Тошкентда «“Капитал бозори тўғрисида”ги Қонун: Ўзбекистон Республикаси капитал бозорини жадал ривожлантириш йўлидаги янги қадам» мавзусида халқаро давра суҳбати бўлиб ўтди. Тадбир Миллий […] томонидан ташкил этилди.
Ўзбекистонда капитал бозорини ривожлантиришнинг янги қоидалари муҳокама қилинди
Тошкентда «Капитал бозори тўғрисида»ги қонун лойиҳасига бағишланган халқаро давра суҳбати бўлиб ўтди. Ушбу ҳужжат бозорни жадал ривожлантириш ва унинг халқаро молия тизимига интеграциялашуви учун замонавий ҳуқуқий ва институционал базани шакллантириши лозим.
5 октябрь куни Тошкентда «“Капитал бозори тўғрисида”ги қонун: Ўзбекистон Республикаси капитал бозорини жадал ривожлантириш сари янги қадам» мавзусида халқаро давра суҳбати бўлиб ўтди. Тадбир Истиқболли лойиҳалар миллий агентлиги (ИЛМА) томонидан Халқаро молия корпорацияси (IFC) ва БМТ Тараққиёт Дастури (БМТТД) билан ҳамкорликда ташкил этилди.
Муҳокамада Олий Мажлис Сенати ва Қонунчилик палатаси, ИЛМА, халқаро молия ташкилотлари, тараққиёт институтлари вакиллари, экспертлар ҳамда капитал бозори инфратузилмаси вакиллари иштирок этди.
Қонун лойиҳаси Олий Мажлис Қонунчилик палатасида биринчи ўқишдан ўтиб бўлган ва иккинчи ўқишга тайёрланмоқда. Ҳужжат 16 боб ва 123 моддадан иборат бўлиб, унда халқаро стандартлар ва илғор тажрибаларни ҳисобга олган ҳолда капитал бозорини тартибга солишни ҳар томонлама янгилаш кўзда тутилган.
Қонун лойиҳасида қандай ўзгаришлар кўзда тутилган
Асосий йўналишлардан бири молиявий воситаларни кенгайтириш бўлади. Қонун лойиҳаси деривативлар — опционлар, своплар, фьючерслар, форвардлар ва нархлар фарқига доир шартномаларни жорий этиш учун ҳуқуқий асос яратади.
Бундан ташқари, таъминланган ва секьюритизацияланган облигациялар, халқаро молия институтларининг облигациялари ҳамда барқарор ривожланиш воситаларидан фойдаланиш имконияти кўзда тутилмоқда.
Алоҳида бўлим ислом молиясига бағишланган. Ислом молияси тамойилларига мувофиқ сукук облигацияларини чиқаришнинг ҳуқуқий механизмини яратиш таклиф этилмоқда.
Янги инфратузилма ва инвесторларни ҳимоя қилиш
Қонун лойиҳасида бозорнинг профессионал иштирокчиларини ривожлантириш кўзда тутилган. Хусусан, кастодианлик фаолиятини алоҳида лицензиялашни жорий этиш, шунингдек, рейтинг агентликлари, бошқарувчи компаниялар ва инвестиция фондларини тартибга солишни такомиллаштириш таклиф этилмоқда.
Яна бир янгилик марказий контрагент институти бўлиб, у битимлар клирингини амалга оширади ҳамда ҳисоб-китоблар ишончлилигини ошириш ва хавф-хатарларни бошқаришга кўмаклашади.
Инвесторларни ҳимоя қилиш учун сукук ва облигациялар эгалари вакили институтини жорий этиш, шунингдек, жисмоний шахсларни уларнинг билими ва тажрибасини ҳисобга олган ҳолда малакали ва малакасиз инвесторларга ажратиш таклиф қилинмоқда.
Ўзбекистон халқаро бозорлар сари йўлда
Қонун лойиҳасида халқаро интеграцияга катта эътибор қаратилган. Ўзбекистон компанияларининг хорижий бозорларга чиқиши, норезидентларнинг қимматли қоғозларини Ўзбекистонда жойлаштириши ва халқаро молия институтларининг облигацияларини чиқариш механизмларини такомиллаштириш кўзда тутилган.
Бу хорижий инвестицияларни жалб қилиш учун қўшимча имкониятлар очиши ва маҳаллий компанияларнинг ташқи молиялаштириш манбаларидан фойдаланиш имкониятларини кенгайтириши кутилмоқда.
Давра суҳбати давомида халқаро экспертлар секьюритизация, таъминланган облигациялар, сукук, GDR, IPO ва деривативларни ривожлантириш бўйича амалий ёндашувларни тақдим этдилар. Муҳокамада ОРБ, IFC, БМТТД, ТРТБ, Franklin Templeton ва Centil вакиллари иштирок этди.
Иштирокчилар, шунингдек, миллий бозор инфратузилмасини янада ривожлантириш, халқаро стандартлар ва Ўзбекистон капитал бозорини глобал молия тизимига интеграция қилиш истиқболларини муҳокама қилдилар.