Ўзбекистонда иссиқлик таъминоти тарифлари ҳар йили 10% атрофида оширилиши мумкин
Иссиқлик таъминоти тарифлари 2028 йилдан бошлаб ҳар йили инфляцияни ҳисобга олган ҳолда, лекин кўпи билан 10 фоизга оширилиши мумкин. Шу билан бирга, ҳукумат лойиҳасида иссиқлик истеъмоли нормативлари пасайтириш томонга қайта кўриб чиқилган тақдирда, тарифларни камайтириш назарда тутилган.
Ўзбекистонда иссиқлик таъминоти тарифлари ҳар йили 10% атрофида оширилиши мумкин
Ўзбекистонда 2028 йилдан бошлаб марказлаштирилган иссиқлик таъминоти тарифларини инфляцияни ҳисобга олган ҳолда ҳар йили ошириш таклиф этилмоқда. Бу Қурилиш ва уй-жой коммунал хўжалиги вазирлиги муҳокама учун эълон қилган ҳукумат қарори лойиҳасида назарда тутилган.
Лойиҳага кўра, тарифлар йилига бир марта — 1 майдан — йиллик инфляцияни ҳисобга олган ҳолда, лекин 10% дан кўп бўлмаган миқдорда индексация қилинади.
Қурилиш ва уй-жой коммунал хўжалиги вазирлиги ҳамда Иқтисодиёт ва молия вазирлигининг таклифлари индексация учун асос бўлади.
Эслатиб ўтамиз, президентнинг 2025 йил 11 мартдаги қарорида аҳоли учун иссиқлик таъминоти бўйича пасайтирилган тарифларни 2030 йилга бориб хизматлар таннархи даражасига босқичма-босқич етказиш назарда тутилган.
Бунда янги лойиҳада 2026 йил 1 ноябрдан иссиқлик ва иссиқ сув тарифларини алоҳида ошириш назарда тутилган. Хусусан, Тошкент шаҳрида ушбу хизматлар қийматини тахминан 30% га ошириш таклиф этилмоқда.
Лойиҳада, шунингдек, иссиқлик юкламаси ва иссиқлик энергияси истеъмоли нормативларини қайта кўриб чиқиш ҳам назарда тутилган.
«Иссиқликтаъминоти» АЖ, унинг таркибига кирувчи корхоналар, шунингдек, давлат-хусусий шериклик асосида марказлаштирилган иссиқлик таъминоти хизматларини кўрсатувчи ташкилотлар икки ой муддатда амалдаги нормативларни шаҳарсозлик нормалари ва қоидаларига мувофиқ қайта кўриб чиқишлари керак бўлади.
Янгиланган кўрсаткичларни Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига тасдиқлаш учун киритиш зарур.
Бунда ҳужжат билан қуйидаги тартибни белгилаш таклиф этилмоқда:
Лойиҳанинг алоҳида блоги иссиқлик энергиясини ишлаб чиқариш ва етказиб бериш харажатларини камайтиришга бағишланган.
Қурилиш ва уй-жой коммунал хўжалиги вазирлиги Энергия самарадорлиги миллий агентлиги, Энергетика вазирлиги, «Иссиқликтаъминоти» АЖ ва бошқа идоралар билан биргаликда бир ой муддатда иссиқлик энергияси таннархини 15% гача камайтириш бўйича чора-тадбирлар дастурини ишлаб чиқиши керак.
Бундан ташқари, 2027 йил охиригача мамлакат иссиқлик таъминоти тизимларини тўлиқ техник аудитдан ўтказиш режалаштирилмоқда.
Унинг натижалари бўйича иссиқлик тармоқлари ва бошқа иссиқлик таъминоти объектларини модернизация қилиш ва қайта қуриш дастури ишлаб чиқилиши керак. Ҳужжат тасдиқлаш учун Вазирлар Маҳкамасига юборилади.
Ижтимоий ва ишлаб чиқариш инфратузилмасини ривожлантириш дастурларини шакллантиришда техник аудитдан ўтган объектларни киритиш назарда тутилмоқда.
Лойиҳада «Иссиқликтаъминоти» АЖ корпоратив бошқарувига ўзгартиришлар киритиш назарда тутилган. Хусусан, бир ой муддатда компания кузатув кенгашининг мустақил аъзолари улушини 75% га етказиш таклиф этилмоқда.
2026 йил охиригача иккита лавозимга — раиснинг молиявий масалалар бўйича ўринбосари ва раиснинг техник масалалар бўйича маслаҳатчиси лавозимларига малакали хорижий мутахассисларни жалб этиш режалаштирилмоқда.
2027 йил 1 апрелгача компаниянинг ижроия органи учун 2027 йил якунлари бўйича иссиқлик тармоқларидаги йўқотишларни 25% га камайтиришни назарда тутувчи самарадорликнинг муҳим кўрсаткичлари (KPI) жорий этилиши керак.
Шунингдек, 2026 йил охиригача «Иссиқликтаъминоти» АЖ таркибидаги иссиқлик таъминоти корхоналари замонавий биллинг тизими билан қамраб олиниши керак.
2027 йил 1 апрелгача компания 2026 йил учун молиявий ҳисоботдан бошлаб, халқаро стандартлар бўйича молиявий ҳисоботни тайёрлашга ўтиши керак.
Қурилиш ва уй-жой коммунал хўжалиги вазирлиги, Иқтисодиёт ва молия вазирлиги, Энергия самарадорлиги миллий агентлиги, Энергетика вазирлиги ва «Иссиқликтаъминоти» АЖ халқаро консультантлар билан биргаликда 2027 йил 1 майгача иссиқлик таъминоти соҳасини 2030 йилгача ривожлантириш стратегик дастурини ишлаб чиқишлари керак бўлади.
Эслатиб ўтамиз, 2026 йилдан бошлаб Ўзбекистонда электр энергияси ва газ тарифлари инфляцияни ҳисобга олган ҳолда, лекин 10% дан кўп бўлмаган миқдорда ҳар йили 1 майдан оширила бошланди.