Ўзбекистонда ижтимоий аҳамиятга эга лойиҳаларга СИ-инфратузилмасидан бепул фойдаланиш имконияти берилади
Ўзбекистонда ижтимоий аҳамиятга эга лойиҳаларга СИ-инфратузилмасидан бепул фойдаланиш имконияти берилади
Рақамли технологиялар ва СИни ривожлантириш учун масъул бўлган университетлар, илмий ташкилотлар, стартаплар ва ҳокимларнинг маслаҳатчилари Рақамли технологиялар вазирлигининг сунъий интеллект инфратузилмасидан бепул ёки имтиёзли шартларда фойдаланишлари мумкин бўлади. Бунинг учун лойиҳалар танлов асосида саралаб олиниши керак.
Имтиёзлар бериш тартиби ҳукумат қарори билан мустаҳкамлаб қўйилди.
Катта тил моделлари билан ишлайдиган лойиҳалар учун олти ойгача бўлган муддатга дастурий интерфейсдан бепул фойдаланиш кўзда тутилган. Ҳар бир календарь ойида 10 миллионгача токенни — СИ ишлайдиган матн бирликларини қайта ишлаш мумкин бўлади.
Агар лойиҳага кўпроқ ресурс керак бўлса, ойига қўшимча равишда 50 миллионгача токендан фойдаланиш мумкин бўлади. Ушбу ҳажм учун 50 % чегирма белгиланган. Фойдаланилмаган токенлар кейинги ойга ўтказилмайди.
Катта тил моделларига тааллуқли бўлмаган бошқа сунъий интеллект моделлари билан ишлаш учун олти ой муддатга 120 гигабайтгача видеохотира олиш мумкин бўлади. Ушбу ресурслар моделларни ўқитиш, синовдан ўтказиш, текшириш, баҳолаш ва ҳисоб-китобларни ишга тушириш учун мўлжалланган.
Лойиҳаларни саралаб олиш танлов асосида йилига икки марта — июль ва ноябрь ойларида ўтказилади. Талабномалар 100 баллик тизим бўйича баҳоланади.
Натижалардан рози бўлмаган иштирокчилар натижалар эълон қилинганидан кейин уч иш куни ичида апелляция комиссиясига электрон шикоят беришлари мумкин бўлади. Мурожаатни кўриб чиқиш учун беш иш куни ажратилади.
Битта фойдаланувчи бир вақтнинг ўзида фақат битта лойиҳани олиб бориши мумкин бўлади. Олинган маълумотларни белгиланган мақсадлардан ташқари ишлатиш, учинчи шахсларга бериш ёки тижорат мақсадларида қўллаш тақиқланади, қонун ҳужжатларида ёки шартномада бошқача ҳол назарда тутилган бўлмаса.
Бундан ташқари, Ўзбекистонда ҳар йили бир миллион ёшларни робототехника, ўйинлар ишлаб чиқиш, стартаплар яратиш ва бошқа истиқболли йўналишларга ўқитиш режалаштирилмоқда.