Ўзбекистонда эпидемия хавфи бўлганда аҳолини эмлаш тартиби белгиланди

Ўзбекистонда эпидемия хавфи бўлганда аҳолини эмлаш тартиби тасдиқланди

Ўзбекистонда карантинли ва хавфли юқумли касалликлар тарқалиши хавфи бўлганда эмлаш тартиби белгиланди. Эмлашлар бош давлат санитария шифокорининг қарорига асосан амалга оширилади, эмлашдан сўнг эса фуқаро тиббий назоратда бўлади.

Профилактик эмлашни ўтказиш тартибини белгиловчи ҳужжат Адлия вазирлиги томонидан рўйхатдан ўтказилди.

Профилактик эмлаш ҳудудда юқумли касаллик аниқланганда, у кенг тарқала бошлаганда ёки аҳолининг айрим гуруҳлари зарарланиши хавфи юзага келганда жорий этилиши мумкин. Бу ҳақдаги қарорни бош давлат санитария шифокори қабул қилади.

Биринчи навбатда, касалликни юқтириб олиш ёки инфекцияни бошқаларга юқтириш хавфи юқори бўлган шахслар эмланади. Шунингдек, инфекция ўчоғида касалланганлар билан мулоқотда бўлганлар ва эпидемиологик кўрсатмалар бўйича эмланиши зарур бўлган шахсларга устуворлик берилади.

Эмлаш учун фақат давлат рўйхатидан ўтган ва тиббиёт амалиётида қўлланилишига рухсат этилган вакциналардан фойдаланишга йўл қўйилади.

Эмлашдан олдин фуқаро тиббиёт ходимлари томонидан кўрикдан ўтказилиши керак. Мутахассислар вакцинага нисбатан сезувчанлик бор-йўқлигини, илгари оғир аллергик реакциялар бўлган-бўлмаганлигини ва бошқа қарши кўрсатмалар мавжудлигини текширадилар.

Эмлашдан олдин, шунингдек, фуқарога вакцина ва ундан кейин юзага келиши мумкин бўлган реакциялар, эмлашдан кейинги назорат тартиби ҳамда эмлашни рад этишнинг ҳуқуқий оқибатлари ҳақида тушунтирилиши лозим.

Ҳар бир эмланган шахс ҳақидаги маълумот эмлаш амалга оширилгандан сўнг дарҳол Ягона тиббий ахборот тизимига киритилади.

Назорат фуқаро эмлаш хонасини тарк этганидан кейин ҳам давом этади. Дастлабки 30 дақиқа давомида уни тиббиёт ходими кузатиб боради. Кейинчалик уч кун давомида эмланган шахснинг аҳволи шифокор ва патронаж ҳамшираси томонидан назорат қилинади.