Ўзбекистонда 5 килограмм опий бўлган яширин жойлар аниқланди. Видео

Ўзбекистонда 5 килограмм опий яширилган хуфия жойлар аниқланди. Видео

Самарқанд ва Хоразм вилоятларида гиёҳвандлик моддаларининг ноқонуний айланмаси билан боғлиқ иккита ҳолатга чек қўйилди. Ҳуқуқни муҳофаза қилувчи органлар ходимлари томонидан жами 5,5 килограммдан ортиқ опий мусодара қилинди.

Махсус операциялар Давлат хавфсизлик хизмати ходимлари томонидан божхоначилар ва ИИВ вакиллари билан ҳамкорликда ўтказилди.

Самарқанд вилоятининг Ургут туманида ҳуқуқ-тартибот ходимлари 53 ёшли маҳаллий турғуннинг хонадонини кўздан кечиришди. Текширув давомида ҳовлида 4,988 килограмм опий кўмиб қўйилгани маълум бўлди. ДХХ маълумотларига кўра, гиёҳвандлик моддалари мамлакатга контрабанда йўли билан олиб кирилган.

Яна бир ҳолат Хоразм вилоятида қайд этилди. "Саримой" постида Сурхондарёдан Хоразмга қараб ҳаракатланаётган Cobalt автомобили тўхтатилди. Мошинада тезкор ходимларнинг кузатувида бўлган термизлик икки нафар 37 ёшли фуқаро бор эди.

Уларнинг мобил телефонлари текширилганда, ҳуқуқ-тартибот ходимлари гиёҳвандлик моддаси яширилган жой ҳақидаги маълумотларни топдилар. Хуфия жой Бухоро вилоятининг Ромитан тумани ҳудудидаги А-380 халқаро трассаси ёнида жойлашган эди. У ердан 539 грамм опий топилди.

Ҳуқуқ-тартибот ходимларининг маълумотларига кўра, қўлга олинганлар гиёҳвандлик моддаларини Хоразм вилоятида сотишни режалаштиришган.

Иккала ҳолат бўйича ҳам контрабанда ва гиёҳвандлик воситаларининг ноқонуний айланмаси учун жавобгарликни назарда тутувчи моддалар билан жиноят ишлари қўзғатилди.

Тергов ҳаракатлари давом этмоқда.

Олдинроқ Ўзбекистонга Афғонистондан 52,6 килограмм гашиш ва опий олиб киришга уринишган эди. Гиёҳвандлик моддалари текширув пайтида аниқлашни қийинлаштириш учун бўш юк машинаси тиркамасининг поли остига яширилган ва бир неча қават қилиб ўраб қўйилган эди.