Ўзбекистон ва ЮНИСЕФ ижтимоий ҳимоя стратегиясини муҳокама қилди
Ўзбекистонда ЮНИСЕФ ва Жаҳон банки иштирокида турли хавф-хатарларни ҳисобга олган ҳолда мослашувчан ижтимоий ҳимоя стратегияси ишлаб чиқилмоқда.
Ўзбекистон ва ЮНИСЕФ ижтимоий ҳимоя стратегиясини муҳокама қилди
3 сентябрь куни Ўзбекистон Иқтисодиёт ва молия вазирлигида вазир ўринбосари Отабек Фозилкаримовнинг ЮНИСЕФ вакиллари билан учрашуви бўлиб ўтди, унда мамлакатнинг мослашувчан ижтимоий ҳимоя стратегиясини ишлаб чиқиш масаласи муҳокама қилинди.
Муҳокамада Жаҳон банки ва Ижтимоий ҳимоя миллий агентлиги вакиллари, шунингдек, халқаро ва миллий консультантлар ҳам иштирок этди.
Томонлар иқлим, табиий ва иқтисодий хавф-хатарларни ҳисобга олган ҳолда аҳолини ижтимоий қўллаб-қувватлаш механизмларини такомиллаштиришни назарда тутувчи стратегияни тайёрлашнинг асосий ёндашувларини кўриб чиқдилар.
Уй хўжаликларининг турли хавф-хатарларга чидамлилигини ошириш ва ижтимоий ёрдамни ўз вақтида кўрсатиш механизмларини яхшилашга алоҳида эътибор қаратилди. Шунингдек, томонлар мослашувчан ижтимоий ҳимоя соҳасида идоралараро ҳамкорликни ривожлантириш масаласини муҳокама қилдилар.
Учрашув якунлари бўйича ҳужжат устида ишлашнинг кейинги йўналишлари белгилаб олинди. Хусусан, манфаатдор томонлар билан маслаҳатлашувлар ўтказиш ва халқаро тажрибани ўрганиш режалаштирилган.
Бундан ташқари, Ўзбекистонда алоҳида эътибор талаб этадиган фавқулодда вазиятлар, шунингдек, табиий ва иқлим хавф-хатарларини ҳамда тегишли чора кўриш механизмларини аниқлаш лозим бўлади.
Учрашув якунида томонлар Мослашувчан ижтимоий ҳимоя стратегияси устида биргаликда ишлашни давом эттириш ва аҳолини ижтимоий қўллаб-қувватлаш механизмларини янада такомиллаштиришга келишиб олдилар.