Ўзбекистон ва Венгрия фармацевтика соҳасидаги ҳамкорликни кенгайтиради
Ўзбекистон ва Венгрия инвестициялар, замонавий технологиялар ҳамда фармацевтика тармоғидаги қўшма лойиҳаларни муҳокама қилди.
Ўзбекистон ва Венгрия фармацевтика соҳасидаги ҳамкорликни кенгайтириш ниятида
Ўзбекистон ва Венгрия фармацевтика тармоғида ҳамкорликни кенгайтириш истиқболларини, жумладан, инвестицияларни жалб қилиш, замонавий технологияларни жорий этиш ва қўшма лойиҳаларни ишга туширишни муҳокама қилди. Бу ҳақда Тиббиёт ва фармацевтика тармоғини ривожлантириш агентлиги хабар бермоқда.
8 сентябрь куни Венгриянинг Ўзбекистондаги Фавқулодда ва Мухтор Элчиси Йожеф Рожа Тиббиёт ва фармацевтика тармоғини ривожлантириш агентлиги директори Абдулла Азизов билан учрашув ўтказди.
Ташриф доирасида венгриялик дипломат Агентлик, Фармацевтика техник университети ва BioPharma City фармацевтика кластери фаолияти билан танишди. Тармоқ вакиллари, шунингдек, кластерда амалга оширилаётган лойиҳалар ва унинг истиқболдаги режалари ҳақида сўзлаб бердилар.
Бундан ташқари, элчининг Абу Али ибн Сино номидаги ихтисослаштирилган мактаб ўқувчилари билан алоҳида учрашуви бўлиб ўтди. Суҳбат давомида ўқувчилар илм-фанга бўлган қизиқишлари билан ўртоқлашдилар ва келажакдаги режалари ҳақида гапириб бердилар.
Музокараларнинг асосий мавзуси фармацевтика соҳасида Ўзбекистон-Венгрия ҳамкорлигини янада ривожлантириш бўлди. Томонлар инвестицияларни жалб қилиш, замонавий технологияларни жорий этиш ва қўшма лойиҳаларни амалга ошириш имкониятларини муҳокама қилдилар.
Учрашув якунлари бўйича Ўзбекистон ва Венгрия ўртасида фармацевтика соҳасида амалий ҳамкорликни ривожлантириш учун янги имкониятлар белгилаб олинди.
Келтирилган маълумотларга кўра, 2025 йил якунлари бўйича Венгриянинг дори воситалари ва фармацевтика маҳсулотлари экспорти қарийб 9,9 млрд еврони ташкил этди.