Ўзбекистон ва Тожикистон санитария назоратини кучайтирмоқда
Ўзбекистон ва Тожикистон трансчегаравий санитария-эпидемиология соҳасидаги ҳамкорлик ҳамда инфекцияларнинг олдини олиш бўйича лойиҳани ишга туширди.
Ўзбекистон ва Тожикистон санитария назоратини кучайтирмоқда
Ўзбекистон ва Тожикистон санитария-эпидемиологик хавфсизлик соҳасида трансчегаравий ҳамкорликни ривожлантириш бўйича лойиҳани бошлади.
Ташаббуснинг бошланишига бағишланган учрашувда икки мамлакат санитария-эпидемиологик осойишталик хизмати, Халқаро миграция ташкилоти, Осиё тараққиёт банки, тегишли идоралар ва халқаро экспертлар вакиллари иштирок этди.
Лойиҳа Тошкент вилоятининг Бекобод туманидаги «Ойбек» ва Тожикистоннинг Сўғд вилоятидаги «Фотехобод» давлат чегараси орқали ўтказиш пунктлари ўртасидаги ҳамкорликни мустаҳкамлашга қаратилган.
Ташаббус доирасида тармоқлараро ишчи гуруҳ тузиш ва трансчегаравий ахборот алмашиш механизмларини ишлаб чиқиш режалаштирилган. Бундан ташқари, эпидемиологик назорат тизимларини кучайтириш ва чегара орқали юқумли касалликлар тарқалишининг олдини олиш чора-тадбирлари кўзда тутилган.
Чегараолди ҳудудлари аҳолиси ва аҳолининг мобил гуруҳлари тиббий эҳтиёжларини ўрганиш лойиҳанинг алоҳида йўналиши бўлади.
Санитария-эпидемиологик осойишталик ва жамоат саломатлиги қўмитаси раиси ўринбосари Ботиржон Қурбонов «Ойбек» ва «Фотехобод» ўтказиш пунктлари Тошкент — Хўжанд йўналишидаги муҳим стратегик объектлар эканини таъкидлади.
Унинг сўзларига кўра, санитария-эпидемиологик назоратни доимий равишда мустаҳкамлаб бориш, шунингдек, икки давлат ваколатли органлари ўртасидаги ҳамкорлик ва мувофиқлаштиришни ривожлантириш зарур.
Лойиҳанинг амалга оширилиши чегараолди ҳудудлари аҳолиси саломатлигини муҳофаза қилишни кучайтириш, юзага келиши мумкин бўлган эпидемиологик таҳдидларга тезкорлик билан жавоб қайтариш имкониятини ошириш ва Марказий Осиёда санитария-эпидемиологик хавфсизликни мустаҳкамлашга хизмат қилиши кутилмоқда.