Ўзбекистон ва Сербия меҳнат миграцияси ва мобиллик тўғрисидаги битимни тайёрламоқда
Ўзбекистон ва Сербия миграция ва мобиллик, жумладан, мутахассисларни ишга жойлаштириш тўғрисидаги ҳукуматлараро битимни имзолашга келишиб олдилар.
Ўзбекистон ва Сербия меҳнат миграцияси ва мобиллик тўғрисидаги битимни тайёрламоқда
Ўзбекистон ва Сербия миграция ва мобиллик соҳасида ҳукуматлараро битим имзолаш бўйича келишувга эришди. Бу ҳақда Миграция агентлиги директори Муҳсинхўжа Абдураҳмонов ва Сербия меҳнат, бандлик, фахрийлар ва ижтимоий сиёсат вазири Милица Стаменковски ўртасидаги учрашув якунларига кўра маълум бўлди.
Томонлар меҳнат миграцияси ва ишчи кучи мобиллиги соҳасидаги ҳамкорликни янада кенгайтиришни муҳокама қилдилар. Музокараларнинг асосий натижаларидан бири Ўзбекистон ва Сербия ўртасида Ҳукуматлараро битимни имзолашга тайёргарлик кўриш бўйича келишув бўлди.
Сербия томони, шунингдек, Сербияда бўлиб ўтадиган EXPO 2027 халқаро кўргазмаси объектлари қурилишига Ўзбекистондан малакали мутахассисларни жалб этишдан манфаатдор эканини билдирди.
Ушбу йўналиш доирасида музокаралар иштирокчилари Сербия томонининг эҳтиёжларини ҳисобга олган ҳолда мутахассисларни олдиндан тайёрлаш, шунингдек, уларни кейинчалик муносиб меҳнат шароитлари назарда тутилган иш жойларига юбориш масалаларини кўриб чиқдилар.
Томонлар Сербиянинг Ўзбекистондаги элчихонасини очиш истиқболларини алоҳида муҳокама қилдилар. Дипломатик ваколатхонанинг очилиши Ўзбекистон фуқаролари учун Сербияга виза расмийлаштиришни осонлаштириши кутилмоқда. Ҳозирги вақтда тегишли тартиб-таомиллар Остона орқали амалга оширилмоқда.
Музокаралар Сербия Миллий бандлик хизмати директори Милан Боснич билан давом эттирилди. Учрашув якунлари бўйича томонлар ҳукуматлараро битим ратификация қилинганидан сўнг икки идора ўртасида ҳамкорлик тўғрисида алоҳида Протокол имзолашга келишиб олдилар.
Ҳужжат Ўзбекистон ва Сербия ўртасида меҳнат миграцияси ва ишчи кучи мобиллиги соҳасидаги ҳамкорликни ривожлантиришга қаратилади.