Ўзбекистон ва Қирғизистон чегарасида янги "Кесканёр" ўтказиш пункти пайдо бўлади

Ўзбекистон ва Қирғизистон чегарасида янги «Кесканёр» ўтказиш пункти очилади

Ўзбекистон-Қирғизистон чегарасида янги «Кесканёр» ўтказиш пункти пайдо бўлади, у ҳозирда фаолият кўрсатаётган «Дўстлик» пунктидан икки баравар катта бўлади. У ишга туширилгач, икки давлат ўртасидаги юк ташиш ҳажми икки-уч бараварга ортиши, чегарадан ўтиш эса бир ҳафтага тезлашиши кутилмоқда.

Бу ҳақда Президент Шавкат Мирзиёев раислигида Андижон вилоятини ижтимоий-иқтисодий ривожлантириш, тадбиркорликни қўллаб-қувватлаш ва аҳоли даромадларини ошириш масалаларига бағишлаб ўтказилган йиғилишда маълум қилинди.

«Кесканёр»нинг ташкил этилиши ҳудуддаги транспорт оқимларининг ўсиши билан боғлиқ. Хусусан, «Хитой – Қирғизистон – Ўзбекистон» темир йўли ишга туширилгач, Андижон вилояти орқали юк ташиш ҳажмини ўн бараварга — йилига 15 миллион тоннагача ошириш режалаштирилган.

Ўсиб бораётган юк оқимига хизмат кўрсатишни таъминлаш мақсадида йил якунига қадар Қўрғонтепа ва Хонабодда 300 гектар майдонда қиймати 600 миллион долларлик логистика мажмуаси лойиҳасини бошлаш топширилди.

Шунингдек, 78 километрлик «Хонабод – Андижон» пуллик автомобиль йўлини лойиҳалаштириш бошланади.

Яна бир транспорт лойиҳаси «Тошкент – Андижон» пуллик йўли бўлади. Уни қуриш бўйича амалий ишларни келгуси йилда бошлаш режалаштирилган.

Шу билан бирга, сентябрь ойидан бошлаб «Тошкент – Андижон» тезюрар поезди қатнай бошлади. Шаҳарлар ўртасидаги йўл вақти олти соатдан тўрт соатгача қисқарди.