Ўзбекистон ва Германия товар айланмасини 2 млрд долларга етказмоқчи
Ўзбекистон Инвестициялар вазирлиги ва Германия элчиси Маттиас Фоллерт инвестициялар, саноат кооперацияси ҳамда икки томонлама тадбирларни тайёрлаш масалаларини муҳокама қилдилар.
Ўзбекистон ва Германия ўзаро товар айланмасини 1,4 миллиард доллардан 2 миллиард долларга етказишни режалаштирмоқда. Бу масала Ўзбекистон Инвестициялар, саноат ва савдо вазирлигида Германия элчиси Маттиас Фоллерт билан ўтказилган учрашувда кўтарилди.
Томонлар савдо-иқтисодий ва инвестициявий шерикликни мустаҳкамлаш, саноат кооперациясини кенгайтириш ва қўшма лойиҳаларни амалга ошириш истиқболларини муҳокама қилдилар. Етакчи Германия компаниялари билан ҳамкорликни ривожлантиришга алоҳида эътибор қаратилди.
Ҳозирда Ўзбекистонда Германия капитали иштирокидаги 253 та корхона фаолият юритмоқда.
Учрашув иштирокчилари, шунингдек, Германия иқтисодиёти Шарқий қўмитаси делегациясининг Ўзбекистонга кутилаётган ташрифига тайёргарлик кўриш масаласига ҳам тўхталиб ўтдилар. Берлинда ўтказилиши режалаштирилган Савдо ва инвестициялар бўйича Ҳукуматлараро ишчи гуруҳнинг 18-йиғилишини ўтказиш яна бир мавзу бўлди.
Музокаралар якунида томонлар амалий ҳамкорликни янада кенгайтириш ва икки мамлакат ўртасидаги ишбилармонлик алоқаларини мустаҳкамлашдан манфаатдор эканликларини тасдиқладилар.