Ўзбекистон уй-жой бозори юқори фаолликни сақлаб қолмоқда
Йил бошидаги кескин ўсишдан сўнг уй-жой савдоси барқарорлашди. Йил бошидан буён энг юқори ўсиш суръатлари Тошкент шаҳри, Сирдарё ва Андижон вилоятларида қайд этилди.
Ўзбекистон уй-жой бозори ҳамон юқори фаолликни намойиш этмоқда
Иқтисодий тадқиқотлар ва ислоҳотлар маркази Ўзбекистон кўчмас мулк бозорининг янгиланган шарҳини эълон қилди.
Жорий йилнинг август ойида республика бўйича 25,1 мингга яқин уй-жой олди-сотди битими расмийлаштирилди, бу ўтган йилнинг август ойидаги кўрсаткич билан деярли бир хил (+0,2%).
Йил бошидан буён (январь–август) Ўзбекистонда уй-жой савдоси ўтган йилга нисбатан 18,4 фоизга ўсиб, 222,5 мингта битимга етди.
Март ойида битимлар сони 43,5 мингтагача сезиларли даражада ўсганидан сўнг, апрель–май ойларида фаоллик пасайди, кейин июнь–июль ойларида ойига 25–26 мингта битим даражасигача тикланди. Август ойида бозор худди шу даражани сақлаб қолди.
Ҳудудлар кесимида
Август ойида фаоллик ўтган йилга нисбатан 14 та ҳудуддан 6 тасида ошди. Тошкент шаҳрида 7,4 мингта уй-жой олди-сотди шартномаси рўйхатга олинди, бу ўтган йилнинг шу давридаги кўрсаткичдан 2,2 фоизга юқоридир.
Шу билан бирга, йил бошидан буён (январь–август) пойтахтда савдо ҳажми 27,5 фоизга ошди.
Йил бошидан буён юқори ўсиш суръатлари Сирдарё (25,4%) ва Андижон (23,8%) вилоятларида ҳам қайд этилди.