Ўзбекистон техникумлари ҳузурида талабалар стартапларини йўлга қўйиш учун компаниялар ташкил этилади

Ўзбекистон давлат техникумлари ҳузурида ўқувчиларнинг истиқболли лойиҳаларини ишга тушириш ва тижоратлаштириш учун махсус spin-off компанияларини ташкил этишга рухсат берилди. Битта стартапни амалга ошириш учун 1 миллиард сўмгача грант олиш мумкин бўлади.

Бундай корхоналар талабаларнинг ғоялари асосида янги маҳсулот ва технологияларни ишлаб чиқиши мумкин бўлади. Улар учун техникумларнинг бўш турган хоналаридан фойдаланишга рухсат берилади ва уларни беш йилгача бўлган муддатга ижарага олиш мумкин бўлади.

2026 йил якунига қадар ҳар бир ҳудуд, Қорақалпоғистон ва Тошкент шаҳрида камида биттадан шундай корхона очилиши керак. Профессионал таълим агентлиги бир ой муддатда биринчи spin-off компаниялари ташкил этиладиган техникумларни белгилайди.