Ўзбекистон шахмат Олимпиадасида илк бор Германияга имкониятни бой бериб, мағлубиятга учради

Ўзбекистон илк бор шахмат Олимпиадасида имкониятни бой бериб, Германияга ютқазди

Ўзбекистон эркаклар терма жамоаси Самарқандда ўтаётган уйдаги Бутунжаҳон шахмат олимпиадасида илк мағлубиятини қабул қилиб олди. Саккизинчи турда Рустам Қосимжонов шогирдлари Германияга 1,5:2,5 ҳисобида имкониятни бой берди.

Германия билан учрашувдаги ягона ғалабани Жавоҳир Синдаров қўлга киритди. Иккинчи тахтада у Маттиас Блюбаумни мағлуб этди. У рақибининг хатоларидан унумли фойдаланиб, партияни ишончли тарзда ғалабагача олиб борди.

Саккиз турдан кейин Синдаров ҳисобида 7 та партияда 5,5 очко бор — тўртта ғалаба ва учта дуранг. Шахматчи уйдаги турнирда ҳали бирор марта ҳам мағлубиятга учрамади. Унинг тайёргарлиги ва халқаро турнирларда, жумладан, шахмат Олимпиадасида иштирок этиши, шунингдек, мураббийлар билан ишлаши Ўзбекистон Миллий банки кўмагида амалга оширилмоқда.

Бироқ Синдаровнинг натижаси терма жамоага ғалабали серияни сақлаб қолишга ёрдам бермади: қуйидаги икки тахтада Германия икки очко олди.

Биринчи тахтада Нодирбек Абдусатторов Винсент Каймер билан дуранг ўйнади, ваҳоланки, ўйиннинг маълум бир палласида у ютқазиш ҳолатида эди.

Нодирбек Ёқуббоев Фредерик Сванега, Шамсиддин Воҳидов эса унинг акаси Расмус Сванега имкониятни бой берди.

Сўнгги партиянинг ҳал қилувчи палласи Воҳидовнинг 16-юришдаги хатоси бўлди, шундан сўнг у руҳ кўринишидаги сифатни йўқотди. У 51-юришгача қаршилик кўрсатишни давом эттирди, аммо Расмус Сване устунликни юзага чиқарди.

Ушбу мағлубият Ўзбекистон учун нафақат жамоавий ҳисобда, балки ушбу Олимпиададаги алоҳида партиялар бўйича ҳам биринчиси бўлди. Саккизинчи тур олдидан мезбонлардан икки жамоавий очкога ортда қолаётган Германия Ўзбекистон терма жамоасига етиб олди — энди ҳар икки жамоада 14 очкодан бор.

Германия, шунингдек, аввалги турларда Ўзбекистоннинг иккинчи ва учинчи терма жамоаларини ҳам мағлуб этган эди.

Бир йўла еттита жамоада 13 очкодан бор: Хитой, Нидерландия, Озарбайжон, АҚШ, Ҳиндистон, Арманистон ва Франция. Ўзбекистоннинг иккинчи терма жамоаси ҳам 13 очко жамғариб, 10-ўринни эгаллаб турибди.

Шу билан бирга, биринчи ўрин учун кураш янада қизғин тус олди. Ҳиндистон ва Озарбайжон 2:2 ҳисобида дуранг ўйнади, Арманистон ва Нидерландия учрашувида ҳам худди шундай натижа қайд этилди. АҚШ Сербияни тор-мор этди — 3,5:0,5, Хитой Польшани мағлуб этди — 2,5:1,5, Франция эса Эронни худди шундай ҳисобда енгди.

Бундан аввал Испанияни мағлуб этган ва Франция билан дуранг ўйнаган (ғалаба қозониши мумкин бўлса-да) Ўзбекистоннинг иккинчи терма жамоаси Англияни мағлуб этди. Жамоа 10-ўринга кўтарилди.

Дастлабки учта партия дуранг билан якунланди: Жаҳонгир Воҳидов Майкл Адамс билан, Абдималик Абдисалимов Гавейн Жонс билан, Муҳаммадзоҳид Суяров эса Люк Макшейн билан очкони бўлишиб олди.

Ҳумоюн Бегмуратов Даниэль Фернандесни мағлуб этиб, жамоага муҳим ғалабани тақдим этди — 2,5:1,5.

Ўзбекистоннинг учинчи эркаклар жамоаси Швейцарияга имкониятни бой берди — 1:3. Саидакбар Сайдалиев ва Алмас Раҳматуллаев мос равишда Себастьян Богнер ва Ли Мин Пэнга ютқазишди, Баҳром Баҳриллаев ва Муҳаммадали Абдураҳмонов ўз партияларини дуранг билан якунлашди.

Ўзбекистон хотин-қизлар асосий терма жамоаси Нидерландия устидан муҳим ғалабага эришди (3:1) ва 6-ўринга кўтарилди.

Афруза Ҳамдамова биринчи тахтада Элине Роберсни мағлуб этди. Умида Омонова Пэн Чжаоцинга имкониятни бой берди, шундан сўнг Нилуфархон Имомқўзиева Махтелд ван Форестни, Гулдона Каримова эса Анна-Мая Казарянни мағлуб этди.

Пешқадамларнинг бошқа учрашувларида Ҳиндистон ва Қозоғистон 2:2 ҳисобида дуранг ўйнади, Хитой эса Грузияни мағлуб этди — 2,5:1,5.

Ўзбекистоннинг иккинчи хотин-қизлар терма жамоаси Кубадан мағлубиятга учраб улгурди: 0,5:2,5 ҳисобида Мадинабону Халилованинг партияси якунланмай қолган эди. Нилуфар Ёқуббоева ва Асал Салимова ўз учрашувларида имкониятни бой беришди, Маржона Маликова эса дуранг ўйнади.

Учинчи хотин-қизлар жамоаси эса, аксинча, Ямайкани мағлуб этди — 3:1. Зилола Актамова, Мафтуна Бобомуродова ва Шоҳина Аҳмедова ўз партияларида ғалаба қозонишди, Барчиной Шокиржонова эса мағлубиятга учради.