Ўзбекистон Сенати низосиз талабларни расмийлаштиришни соддалаштирди
Ўзбекистон Сенати низосиз талабларни нотариал расмийлаштириш ва ҳужжатларни электрон ижро этиш имкониятларини кенгайтирувчи ўзгартиришларни маъқуллади.
Ўзбекистон Сенати низосиз талабларни расмийлаштиришни соддалаштирди
Ўзбекистон Олий Мажлиси Сенати низосиз талабларни нотариал расмийлаштириш ва ижро этишни соддалаштиришни, шунингдек, суд ва ижро соҳаларида бир қатор тартиб-таомилларни қисқартиришни назарда тутувчи қонунни маъқуллади.
«Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида»ги ҳужжат Сенатнинг навбатдаги ялпи мажлисида кўриб чиқилди.
Ўзгартиришлар Фуқаролик процессуал ва Иқтисодий процессуал кодексларига, «Суд ҳужжатлари ва бошқа органлар ҳужжатларини ижро этиш тўғрисида»ги ҳамда «Давлат божи тўғрисида»ги қонунларга киритилди. Улар низосиз талаблар бўйича суд буйруқларини чиқариш муддатларини қисқартиришни, нотариал фаолиятда ахборот-коммуникация технологияларини қўллашни кенгайтиришни ва нотариал ҳаракатлар учун йиғимларни оптималлаштиришни назарда тутади.
Асосий янгиликлардан бири қонунда белгиланган мезонларга риоя қилинган тақдирда, БҲМнинг 1 000 бараваригача бўлган миқдордаги низосиз талаблар бўйича нотариусга мурожаат қилиш имкониятини кенгайтириш бўлади. Бу бундай талабларни судга мурожаат қилмасдан, нотариус орқали расмийлаштириш ва ижро этиш имконини беради.
Бундан ташқари, нотариусларга QR-кодли ижро варақаларини бевосита ижро органларига электрон шаклда юбориш имконияти берилмоқда. Бундай тартиб ҳужжатларни қоғоз ташувчиларда тақдим этиш билан боғлиқ бир қатор ортиқча тартиб-таомиллардан воз кечиш имконини беради.
Ўзгартиришлар, шунингдек, қонуний кучга кирган суд ҳужжатлари устидан юқори инстанцияга шикоят қилинганда, уларнинг ижросини тўхтатиб туриш тартибига ҳам дахлдордир. Тегишли қоидалар Иқтисодий процессуал кодексида аниқлаштирилмоқда.
Апелляция, кассация ва тафтиш инстанцияларида суд ҳужжатлари ижросини тўхтатиб туриш асослари алоҳида белгиланмоқда. Тўхтатиб туришни сўраб илтимоснома киритаётган шахс, агар ушбу чора қўлланилмаса, кейинчалик қайта тиклаш суд ҳужжатининг ижросини қийинлаштириши ёки уни имконсиз қилиб қўйишини асослаб бериши керак бўлади.
Қабул қилинган ўзгартиришлар, сенаторларнинг баҳолашича, судлар зиммасидаги юкламани камайтиришга, фуқаролар ва тадбиркорларнинг вақт ҳамда молиявий харажатларини қисқартиришга, низосиз талабларни расмийлаштиришни тезлаштиришга ва ижро иши юритиш самарадорлигини оширишга қаратилган.
Қонун сенаторлар томонидан маъқулланди.