Ўзбекистон мактабларида ўқувчиларнинг рюкзаклари вейплар бор-йўқлигига текширилмоқда. Видео
Ўзбекистон мактабларида ўқувчиларнинг рюкзаклари вейплар бор-йўқлигига текширилмоқда. Видео
Ўзбекистон мактабларида ўқувчиларнинг рюкзаклари ва шахсий буюмлари текширилмоқда, ушбу жараёнда мактаб ўқувчиларидан вейплар топилмоқда. Прокуратура бундай профилактика тадбирлари ҳақида расман маълум қилди ва текширувлардан бирининг видеосини эълон қилди.
Профилактика инспекторлари синфларга кириши, ўқувчиларнинг сумкаларини кўздан кечириши ва улар билан профилактик суҳбатлар ўтказиши мумкин. Бундай тадбирлар вояга етмаганлар ўртасида ҳуқуқбузарликларнинг олдини олиш доирасида ташкил этилмоқда.
Прокуратура Ўзбекистонда вейплар тақиқланганини эслатиб ўтди. Икки ва ундан ортиқ электрон сигаретни сақлаганлик учун қурилмаларни мусодара қилган ҳолда базавий ҳисоблаш миқдорининг 100 бараваридан 200 бараваригача жарима кўзда тутилган. БҲМнинг амалдаги миқдорини ҳисобга олган ҳолда, жарима суммаси 44 миллиондан 88 миллион сўмгачани ташкил этади.
Шахсий фойдаланиш учун битта электрон сигарет сақланганда БҲМнинг бир баравари — 440 минг сўм миқдорида жарима қўлланилиши мумкин.
Прокуратура ўқувчилар билан профилактик текширувлар ва суҳбатлар ҳуқуқбузарликларнинг олдини олиш мақсадида ўтказилаётганини таъкидлади.