Ўзбекистон Жанубий Корея ва Британия билан қурилиш соҳасидаги ҳамкорликни муҳокама қилди
Ўзбекистон Қурилиш ва уй-жой коммунал хўжалиги вазирлиги JACE KOREA ҳамда Connected Places Catapult ташкилотлари билан сейсмик чидамли қурилиш ва BIM-технологияларини жорий этиш масалалари бўйича музокаралар ўтказди.
Ўзбекистон Жанубий Корея ва Британия билан қурилиш соҳасидаги ҳамкорликни муҳокама қилди
Ўзбекистон Қурилиш ва уй-жой коммунал хўжалиги вазирлиги Жанубий Кореянинг JACE KOREA компанияси ҳамда Британиянинг Connected Places Catapult (CPC) ташкилоти вакиллари билан халқаро ҳамкорликни кенгайтириш ва қурилиш соҳасига замонавий технологияларни жорий этиш бўйича музокаралар ўтказди.
JACE KOREA делегацияси билан учрашувда томонлар Ўзбекистонда қурилиш ва уй-жой коммунал хўжалиги соҳасидаги ислоҳотлар, ижтимоий инфратузилма объектларини сейсмик лойиҳалашда Жанубий Корея тажрибасидан фойдаланиш, шунингдек, қўшма лойиҳаларнинг истиқболларини муҳокама қилдилар.
Музокаралар якунида биноларни сейсмик мустаҳкамлаш соҳасида тажриба алмашиш ва давлат-хусусий шериклик асосида инвестиция лойиҳаларини амалга ошириш бўйича келишувга эришилди.
Connected Places Catapult вакиллари билан алоҳида онлайн учрашув ўтказилиб, у Ўзбекистонда биноларни ахборот моделлаштириш (BIM) технологияларини жорий этишга бағишланди.
Музокаралар Британиянинг Халқаро рақамли қурилиш дастури (Digital Construction International Programme, DCIP) доирасида бўлиб ўтди.
Иштирокчилар BIM-технологияларини жорий этишнинг ҳозирги ҳолати, халқаро тажриба ва миллий йўл харитасини такомиллаштириш имкониятларини кўриб чиқдилар.
Шунингдек, соҳани рақамлаштиришнинг норматив-ҳуқуқий ва институционал базасини ривожлантириш, техник стандартларни ишлаб чиқиш ва давлат харидларида BIM’ни қўллаш масалалари муҳокама қилинди.
Бундан ташқари, томонлар мутахассислар малакасини ошириш ва амалдаги ахборот тизимларини интеграция қилиш масалаларига тўхталиб ўтдилар.