Ўзбекистон фуқароси Коннектикутда 12 миллион долларлик юкни ўғирлаганликда айбланди
Tashkent Times — Ўзбекистоннинг энг сўнгги янгиликларини ёритиб борувчи инглиз тилидаги онлайн-газетадир.
**Коннектикутда ўзбекистонлик эркак 12 миллион долларлик юкни ўғирлаганликда айбланди**
Йук ташиш тизимидан 12 миллион доллардан ортиқ қийматдаги юкларни ўғирлаганликда айбланаётган ўзбекистонлик эркак чоршанба куни Бриджпортдаги федерал судга келтирилди ва тил бириктириш айблови бўйича ўзини айбдор эмас деб тан олди.
Ушбу иш Нью-Хейвендаги федерал катта ҳакамлар ҳайъати томонидан 22 сентябрь куни 33 ёшли Нурсултон Иззатуллоевич Хайдаровга нисбатан чиқарилган айблов хулосасидан сўнг бошланган. Чил бириктириш моддаси бўйича айби исботланса, уни максимал озодликдан маҳрум қилиш жазоси кутмоқда — беш йилгача қамоқ.
Коннектикут округи бўйича АҚШ прокурори ҳисоботида Хайдаров қўшилганликда айбланаётган фитна тафсилотлари келтирилган.
Суд ҳужжатлари ва баёнотлари Миллий хавфсизлик оператив гуруҳи Калифорния ва бошқа штатлардаги объектлардан содир этилган бир қатор юк ўғирликларини суриштираётганини кўрсатади.
Терговчиларнинг таъкидлашича, 2025 йилнинг сентябрь ойидан бошлаб Хайдаров ва унинг эҳтимолий шериклари бир нечта юк ташувчи компанияларни сотиб олишган ёки бошқача тарзда ўз назоратига олишган.
Сўнг улар компанияларнинг АҚШ Транспорт вазирлиги рақамларини, юк ташувчиларнинг идентификация рақамларини, электрон почта ҳисобларини ва эгаларининг шахсини қўлга киритишган.
Прокурорларнинг айтишича, ушбу шахслар ўзларини собиқ эгалар қилиб кўрсатишган ҳамда штатлараро юк ташиш бўйича шартномаларни қўлга киритиш учун мавжуд бизнеснинг обрўси ва ишончлилигидан фойдаланишган.
Юк брокери штатлараро юк ташиш бўйича шартнома тузгач, ҳайдовчи тақсимлаш пунктидан юкни қабул қилиб олган.
Шунга қарамай, ҳисоботда айтилишича, кўплаб юклар манзилга етказилмаган ва ўғирланган деб хабар қилинган. Баъзи ҳолларда, айбланаётган жиноятчилар ўғирланган товарларни қайтариш учун товон пули ҳам талаб қилишган.
Айблов хулосасига кўра, Хайдаров АҚШда қонуний доимий яшовчи бўлган ва Нью-Джерси штати томонидан берилган ҳақиқий тижорат ҳайдовчилик гувоҳномасига эга бўлган.
Шунингдек, у «Сайид Махмударов», «Рустам Мавлонов», «Дмитрий Аганин», «Роман Смиров» ва «Кайрат Нуртас» номларига расмийлаштирилган сохта ҳайдовчилик гувоҳномаларига эга бўлгани айтилмоқда.
Прокурорларнинг таъкидлашича, ушбу шахсни тасдиқловчи ҳужжатларнинг ҳар бирида Хайдаровнинг юз тузилиши ўзгартирилган фотосурати бўлган.
Ушбу тил бириктириш натижасида камида 24 та юк партияси ўғирлангани айтилмоқда.
Ушбу юклар таркибига қаттиқ дисклар, стерео ускуналар, кийим-кечак, электроника, компьтер ускуналари, озиқ-овқат маҳсулотлари, никотин маҳсулотлари ва бошқа қимматбаҳо товарлар кирган.
Таъкидланганидек, ҳисоботда айнан Хайдаров алоқадор дейилган ўғирликлардан етказилган зарар миқдори 12 миллион доллардан ортиқ деб баҳоланмоқда.
Хайдаров 1 июнь куни Калифорния штатининг Онтарио шаҳрида федерал жиноий шикоят асосида ҳибсга олинган. Ўшандан бери у ҳибсда сақланмоқда ва чоршанба куни судда ҳозир бўлиш учун Бриджпортга олиб келинди.
Прокурорлар Хайдаровнинг айби судда оқилона шубҳадан холи тарзда исботланмагунича, у айбсиз деб ҳисобланишини таъкидламоқда.
Ушбу иш Федерал қидирув бюроси томонидан АҚШ Транспорт вазирлигининг Бош инспектор офиси, Ички даромадлар хизматининг Жиноий тергов бўлими, Миллий хавфсизлик терговлари ҳамда Калифорния штатининг Фуллертон ва Онтарио шаҳарлари полиция бошқармалари кўмагида тергов қилинмоқда.