Ўзбекистон фуқаролари учун Таиландга визани қандай олиш мумкин
2026 йил 15 сентябрдан бошлаб Ўзбекистон фуқароларига Таиландга бориш учун виза керак бўлади. Визасиз кириш ва етиб келганда виза олиш тартиби энди амал қилмайди. Виза олдиндан Thai e-Visa орқали расмийлаштирилади, консуллик йиғими эса Таиланднинг Москвадаги элчихонасида тўланади. Қандай ҳужжатларни тайёрлаш, аризани қандай тўлдириш, йиғимни қандай тўлаш ва учиб кетишдан олдин нималар қилиш кераклигини кўриб чиқамиз.
Ўзбекистон фуқаролари учун Таиландга визани қандай расмийлаштириш керак
Дам олиш мақсадидаги саёҳат учун Tourist Visa (TR) туристик визаси талаб қилинади. Бир марталик виза уч ойга берилади, бунда ушбу виза билан Таиландда 60 кунгача қолиш мумкин. Консуллик йиғими 40 долларни ташкил этади, деб хабар беради Таиланднинг Москвадаги элчихонаси.
Таиландга тез-тез учадиганлар учун кўп марталик METV туристик визаси мос келиши мумкин. Унинг қиймати — 200 доллар, амал қилиш муддати — олти ой. Унга қўйиладиган талаблар анча қаттиқроқ: охирги уч ойлик кўчирма талаб қилинади, унда ҳар ойлик қолдиқ камида 2 000 долларни ташкил этиши керак, шунингдек, саёҳат йўналиши ва иш жойидан маълумотнома зарур.
Агар саёҳат Таиландда ўқиш, ишлаш, даволаниш ёки узоқ муддат яшаш билан боғлиқ бўлса, бошқа виза талаб қилинади. Визаларнинг барча турлари ва уларга қўйиладиган талаблар Таиланднинг Москвадаги элчихонаси сайтида кўрсатилган.
Қандай ҳужжатлар керак
Ҳужжат топширишдан олдин қуйидагиларни тайёрлаш лозим: амал қилиш муддати камида олти ой бўлган хорижга чиқиш паспорти ва унинг нусхаси; топширишдан камида олти ой олдин олинган 4 × 6 см ўлчамдаги фотосурат: оч рангли фон, юз анфас, бош кийимсиз ва қора кўзойнаксиз, елкалар ёпиқ бўлиши керак; тўлиқ тўланган бориш ва қайтиш авиачипталари; Таиланддаги меҳмонхона ёки бошқа турар жой брон қилинганлиги ҳақида ҳужжат; Ўзбекистондаги доимий яшаш жойи тўғрисида маълумотнома; банк кўчирмасининг асли.
Ҳужжатлар Thai e-Visa тизимига юкланади. Элчихона рус, ўзбек ёки инглиз тилидан ташқари исталган бошқа тилдаги ҳужжатларни фақат нотариус томонидан тасдиқланган инглиз тилидаги таржимаси билан бирга қабул қилади.
Вояга етмаганлар учун қўшимча равишда туғилганлик ҳақидаги гувоҳноманинг нотариал тасдиқланган нусхаси ва агар бола ота-онасидан бирисиз ёки иккаласисиз саёҳат қилаётган бўлса, ота-онасининг ёки қонуний вакилининг нотариал розилиги талаб қилинади.