Ўзбекистон АҚШ билан 7 миллиард долларлик лойиҳаларни амалга оширди
Ўзбекистон АҚШ билан умумий қиймати 35 миллиард долларлик келишувлардан ҳозиргача 7 миллиард долларлик лойиҳаларни амалга оширди.
Бу ҳақда инвестициялар, саноат ва савдо вазири Лазиз Қўдратов The Washington Times газетасига берган интервьюсида маълум қилди.
Қўдратов аллақачон амалга оширилган 7 миллиард долларлик лойиҳаларга айнан қайсилар киришига аниқлик киритмади. Бундан аввал томонлар энергетика, муҳим фойдали қазилмалар, транспорт, қишлоқ хўжалиги, IT ва бошқа соҳалардаги ҳамкорлик ҳақида баёнот берган эди.
Ноябрь ойида Ўзбекистон ва АҚШ кенг кўламли савдо-иқтисодий ҳамкорлик бўйича келишиб олдилар. Яқин ўн йил ичида Ўзбекистон Америка иқтисодиётига 100 миллиард доллардан ортиқ маблағ йўналтиришни режалаштирмоқда.
Ўшанда Дональд Трамп ўзининг Truth Social ижтимоий тармоғида ёзганидек, биринчи босқичда — уч йил давомида — Ўзбекистоннинг АҚШ иқтисодиётига киритадиган инвестициялари ҳажми тахминан 35 миллиард долларни ташкил этади.