Ўсмир рокер Нене Роял «America's Got Talent» шоусида ғолиб чиққан илк таиландлик бўлди

Ўсмир рокер Нене Роял America's Got Talent шоусида ғолиб чиққан илк таиландлик бўлди

Нене танловнинг дастлабки босқичлариданоқ томошабинларнинг севимли иштирокчисига айланди

16 ёшли рокер Нене Роял America's Got Talent шоусининг энг янги ғолиби деб эълон қилинди ва ушбу узоқ йиллик истеъдодлар танловида ғолиб чиққан илк таиландлик бўлди.

Сешанба куни Калифорнияда бўлиб ўтган финалда асл исми Раттикарн Амлой бўлган Нене Американинг The White Stripes рок дуэтининг Seven Nation Army қўшиғини куйлади.

Унинг хеви-метал йўналишидаги чиқишлари қолган тўққиз нафар финалчини, жумладан, иллюзионист, итлар билан чиқиш қилган ижрочилар ва ҳатто робот рақс гуруҳини ортда қолдирди.

Таиландда кўпчилик унинг ғалабасини байрам қилмоқда, баъзилар унинг «дунёдаги энг йирик саҳналардан бирига» чиққанидан фахрланишини айтмоқда. Таиланд ҳукумати уни «катта орзулар қилишга журъат этган ҳар бир киши учун илҳом манбаи» деб атади.

Нене ўз кастингидан олинган вирал видеодан сўнг тезда мухлисларнинг севимлисига айланди. Унда у ҳайратда қолган ҳакамлар ҳайъати қаршисида The Cranberries гуруҳининг Zombie қўшиғини юксак маҳорат билан ижро этган эди. Ушбу видео ҳозиргача 20 миллион марта кўрилди.

Чоршанба оқшомида, натижалар эълон қилинишидан олдин, Нене Linkin Park гуруҳи билан саҳнага чиқиб, Америка гуруҳининг 2024 йилдаги The Emptiness Machine рок қўшиғини биргаликда ижро этди.

Ўша оқшом кечроқ, шоунинг 21-мавсуми ғолиби деб эълон қилинганидан сўнг, у ерга тиз чўкиб йиғлаб юборди. Ғолиблик учун 1 миллион доллар (755 000 фунт стерлинг) миқдоридаги мукофот кўзда тутилган.

«Ҳозир жуда хурсандман ва ҳаяжондаман», деди у ўзини қўллаб-қувватлаган барчага миннатдорчилик билдириб.

Натижалар эълон қилинадиган дастурни Таиланддаги кўплаб мухлислари ҳам диққат билан кузатиб боришди, чунки улар NBC телеканалидаги жонли эфирни томоша қила олишмасди.

Таиланддаги кўпчилик YouTube'даги жонли трансляцияга уланишга мажбур бўлди ва натижалар эълон қилинаётган вақтда эфир тўсатдан узилиб қолганида хавотирга тушишди.

Бироқ бир неча дақиқадан сўнг, Нененинг тарихий ғалабаси ҳақидаги хабар тарқалгач, енгил тортишди ва хурсандчилик қилишди.

«Тарих яратилди!» деб ёзди таиландлик ижтимоий тармоқ фойдаланувчиларидан бири Facebook'да.

«Дунё ёзиб қўйсин, бу таиландлик бола ақл бовар қилмайдиган даражада истеъдодли», деб ёзди бошқаси.

16 ёшли Нене Роял ўзининг хеви-метал чиқишлари билан интернетда машҳур бўлиб кетди

«Бу ғалабани ўзига хос қиладиган жиҳат шундаки, Нене ўз таиландлик ўзлигини дунёнинг энг йирик саҳналаридан бирига ишонч билан олиб чиқди», дейилади Таиланд ҳукумати жамоатчилик билан алоқалар департаментининг пайшанба кунги баёнотида.

«У истеъдод, меҳнат ва қатъият ҳар қандай жойдан, жумладан, Пхукетдан келган гитара ва катта орзуга эга ёш қиздан ҳам чиқиши мумкинлигини кўрсатди».

Нененинг сўзларига кўра, у етти ёшидан гитара чалишни бошлаган ва гастролларда юрадиган мусиқачи бўлишни орзу қилган.

Ўзининг туғилиб ўсган шаҳри — соҳиллари ва денгиз бўйидаги курортлари билан машҳур бўлган сайёҳлик маскани Пхукетда Нене Naka Weekend Market бозорида кўча мусиқачиси сифатида танилган эди.

Пхукетлик 43 ёшли гид Пиярат На Сонгхла BBC'га Нене Роялнинг чиқишларини болалигидан бери кузатиб келганини айтди.

«У жуда ширин қиз», дейди у. «Мен у учун жуда хурсандман ва ҳаяжондаман. Унинг бу қадар узоққа борганига ишониш қийин. У билан жуда фахрланаман».

Нака Веекенд Маркет бозорининг Фасебоок'даги саҳифасида унинг ғалабасидан сўнг Ненега бағишланган пост жойлаштирилди.

«Нака Маркет'даги ҳар бир киши сенинг дунёнинг энг йирик саҳналаридан бирида порлаётганингни кўришдан фахрланади», дейилади постда.

«Сенинг истеъдодинг, қалбинг ва жасоратинг жуда кўп одамларни руҳлантирди ва бу ғалаба инсон ўз орзусига чин дилдан бор вужудини бағишлаганида нималар содир бўлиши мумкинлигини гўзал тарзда эслатиб туради».

Нене таҳсил оладиган Пхукетдаги Kajonkiet халқаро мактаби ҳам уни ғалаба билан табриклади.

«Биз сен билан жуда фахрланамиз», дейилади мактабнинг Facebook'даги постида. Унда ўқувчилар ва ходимлар Нененинг финал чиқишини томоша қилиш учун йиғилиб, унинг исмини айтиб бақираётгани акс этган видео ҳам улашилган.