Ўргамчакнинг кашф этилиши «яширин хазина»ни топгандек бўлди
Маврикийда ишлаётган Durell олимлари томонидан тўр-қопқонли ўргимчакнинг янги тури кашф этилди.
Ўргимчакнинг кашф этилиши «яширин хазина» топилишига қиёсланди
Табиатни муҳофаза қилиш мутахассислари Маврикий оролида иш олиб боришганда Маврикий сув ости қопқончи ўргимчагини аниқлашди
Олимлар янги ўргимчак турини аниқлаганларидан сўнг «мутлақо ҳайратда қолганларини» айтишди.
Джерсидаги Durrell Wildlife Conservation Trust жамғармаси жамоаси Маврикийнинг Илот Вакоас оролида ҳамкорлар билан ишлаётганда, 2023 йилда соҳил бўйидаги қоялар орасида ушбу ўргимчаксимон жонзот кўриб қолдинган эди.
Хайрия ташкилотининг билдиришича, бу топилма қопқончи ўргимчакларнинг янги тури экани тасдиқланди ва кейинчалик унга Маврикий сув ости қопқончи ўргимчаги (Idioctis marevallum) деб ном берилди.
Ўргимчакни кашф этган энтомолог, доктор Макс Терсель бу ҳолатни «яширин хазина»ни топгандек ҳис қилганини айтди.
Кашфиётни ёдга олар экан, Терсель ўргимчакни «сийрак ўсимликларга эга соҳил бўйидаги қоялар орасидан» топганини айтди.
Унинг сўзларига кўра, бу «бунчалик ҳайратланарли нарсани топишни кутган жойимиз эмас эди».
«Ўшанда қоронғи тушган эди ва мен пешона чироғим билан қоя ёриқларини синчковлик билан қидираётгандим. Тўсатдан, ҳайратимга сабаб бўлиб, ўзимга таниш бўлган шаклни кўриб қолдим — уясидан ўргимчакнинг оёқлари чиқиб турарди. Мен бундай нарсани илгари фақат қалин ўрмонлар ва ўтлоқларда кўргандим», — деди у.
«Мен мутлақо ҳайратда қолдим».
Durrell Wildlife Conservation Trust жамғармасининг таъкидлашича, бошқа қопқончи ўргимчаклар каби ўз уясини ковлаш ўрнига, Маврикий сув ости ўргимчаги минг йиллар олдин қуртлар ва моллюскалар томонидан ҳосил қилинган деб ҳисобланган маржон қояларидаги найчаларда яшайди.
Жамғарманинг билдиришича, ўргимчак кириш жойини ипак, қум ва сувўтлардан ясалган қопқон-эшикча билан ёпади ҳамда сув кўтарилганда унинг уйи тўлиқ сув остида қолади ва кетма-кет тўлқинлар зарбасига учрайди.
Durrell жамғармасининг Маврикий бўйича менежери Ник Коул бу кашфиёт «инонилмас даражада ҳаяжонли» эканини айтди.
У шундай деди: «Энг кўп эсимда қолгани — Макснинг мигаломорфни, яъни қопқончи ўргимчакни кўриб қолиб, ёнига боришимни сўраб бақиргани бўлди.
Тарантулалар билан бир гуруҳга мансуб жонзот шундай жойда яшаши мумкинлигига ишона олмасдим.
Мен туни билан ухламай, алоқани ушлаш учун телефонимни ҳавода тутиб турдим ва Маврикийда шунга ўхшаш ўргимчак ҳақида бирор бир далил қидирдим».