Ўлим жазоси кутиш камерасида 41 йил ўтирган киши гаров эвазига озодликка чиқарилди
Янги ДНК таҳлили аёлни ўлдирганликда айбланиб, лекин доимо ўз айбсизлигини таъкидлаб келган, ҳозирда 71 ёшли Дуглас Стюарт Картерга мос келмади.
**Ўлим жазоси кутиш камерасида 41 йил ўтирган киши гаров эвазига озодликка чиқарилди**
АҚШда аёл кишини ўлдирганликда айбланиб, ўлим жазоси кутиш камерасида 41 йил умрини ўтказган эркак, прокурорлар янги текширилган ДНК далиллари уни жиноятга боғламаслигини айтганидан кейин гаров эвазига озодликка чиқарилди.
Ҳозирда 71 ёшда бўлган Дуглас Стюарт Картер 1985 йилда Юта штатида Ева Олесенни ўлдирганлик учун қамоққа олинган эди.
У ўлим жазосига ҳукм қилинган, бироқ имзоланган иқрорнома ундан қийноқлар остида олинганини айтиб, доимо ўзининг айбсиз эканини таъкидлаб келган.
Ўтган йили штат Олий суди терговчилар томонидан йўл қўйилган қонунбузарликларга ишора қилиб, янги суд жараёнини бошлашни буюрди ва душанба куни судья жабрланувчининг оиласи эътирозларига қарамай, Картерни гаров эвазига озод қилиш ҳақида қарор чиқарди. У гаровда бўлган вақтида GPS мониторини тақиб юриши керак.
Маҳаллий полиция бошлиғининг холаси бўлган Олесен 1985 йил февраль ойида Юта штатининг Прово шаҳридаги уйида бир неча бор пичоқланган ва кейин бошининг орқа қисмига ўқ узилган ҳолда топилган.
Асли чикаголик бўлган Картер қотиллик содир этилган вақтда Юта штатида онаси билан бирга яшаган. Суд ҳужжатларига кўра, полиция уни талончилик пайтида Олесенни ўлдирганликда гумон қилган.
Ўзини бошқа бир иш бўйича қидирилаётган деб ўйлаган Картер Юта штатидан қочиб кетган, бироқ кейинроқ Теннесси штатининг Нашвилл шаҳрида топилган. Сўнгра у сўроқ пайтида иқрорномага имзо чеккан, кейинчалик бу иқрорнома босим остида олинганини айтган.
Картерни жиноят жойига боғлайдиган ҳеч қандай ашёвий далил бўлмаса-да, ҳакамлар ҳайъати уни иқрорнома ва унинг қотиллик билан мақтанганини айтган икки гувоҳнинг кўрсатмалари асосида айбдор деб топган.
Бироқ, гувоҳлар кейинчалик, 2011 йилда, судда ёлғон гапиришга мажбурланганликларини, полиция томонидан уларга пул ва совғалар берилганини ҳамда Картерга қарши кўрсатма бермасалар, депортация қилиниши билан таҳдид қилинганини айтишган.
Орадан ўн йилдан кўпроқ вақт ўтгач, Юта Олий суди ўтган йили янги суд жараёнини ўтказиш ҳақида буйруқ берди.
Картер доимо ўз айбсизлигини таъкидлаб, имзоланган иқрорнома босим остида олинганини билдириб келган.
Қора танли бўлган Картернинг адвокатлари гувоҳлар қотиллик жойидан оқ танли киши қочиб кетаётганини кўришганини ва терговчи жабрланувчининг турмуш ўртоғи Орла Олесенга ишора қилувчи далилларни яширганини айтишди.
Уларнинг сўзларига кўра, прокурорлар унга нисбатан айблов эълон қилишга яқин бўлишган, бироқ полиция ходими терговни давом эттириш учун улардан буни қилмасликни сўраган.
Олесеннинг 2009 йилда вафот этган турмуш ўртоғи полицияга хотинини уйида ўлик ҳолда топганини айтган эди.
Жабрланувчининг пичоқ жароҳатлари уларнинг ошхонасидаги пичоқ билан етказилгани айтилган, ушбу пичоқ унинг жасади яқинидан топилган. Тўппонча эса воқеа жойидан топилмаган.
Шу ойда прокурорлар ДНК таҳлили натижалари эшик тутқичидан топилган қон ва пичоқ дастасидан олинган генетик материал Картерга тегишли эмаслигини кўрсатганини маълум қилишди.
Картернинг озод этилиши Олесен оиласининг хоҳишига зиддир.
Ева Олесеннинг келини Тереза Олесен душанба кунги гаров бўйича эшитувда унинг оиласи Картернинг озод этилишидан "жиддий хавотирда" эканини айтди. У Картер янги суд жараёнини кутиш вақтида қамоқда қолиши кераклигини таъкидлади.
"Биз аниқ бир мослик чиқишига умид қилгандик", деди Олесен ДНК таҳлили ҳақида. "Бу унинг у ерда бўлмаганини англатмайди".
Аммо Картернинг ҳимоячиси Нил Ҳамилтон ишни тугатишни талаб қилди.
"Агар Юта штати ўз деганига эришганида, у биз ушбу қонунбузарликларни аниқлашимиздан 15-20 йил олдин қатл этилган бўлар эди", деди у Associated Press агентлигига.