Ўлдирилган ўсмирнинг оиласи D4vd судида ўлим жазосини талаб қилмоқда
Селесте Ривас Эрнандеснинг ота-онаси агар D4vd айбдор деб топилса, қатл этилиши «айни муддао бўлишини» айтмоқда.
Ўлдирилган ўсмир қизнинг оиласи D4vd иши бўйича ўлим жазосини талаб қилмоқда
Селеста Ривас Эрнандеснинг жасад қолдиқлари 2025 йил сентябрь ойида D4vd манзилига рўйхатдан ўтказилган Tesla ичидан топилган эди
14 ёшли Селеста Ривас Эрнандеснинг оиласи, агар D4vd қизларини ўлдиришда айбдор деб топилса, унга ўлим жазоси берилишини талаб қилди.
Ҳақиқий исми Дэвид Энтони Берк бўлган D4vd 2025 йил 8 сентябрда унинг манзилига рўйхатдан ўтказилган Tesla автомобили юкхонасидан бўлакланган жасади топилган ўсмир қизни ўлдирганликда айбланмоқда. Берк айбловлар бўйича ўзини айбдор деб тан олмади.
Берк суд қилиниши кутилаётган Калифорнияда ўлим жазоси вақтинча тақиқланган бўлса-да, Эрнандеснинг оиласи ўз баёнотида, агар хонанда қотилликда айбдор деб топилса, қатл этилиши «айни муддао бўлишини» айтди.
Бундан ташқари, жума куни Эрнандеснинг ота-онаси Беркга қарши фуқаролик даъвоси қўзғатиб, дафн маросими харажатларини ўз ичига олган молиявий зарарни қоплашни талаб қилишди.
Мерседес Мартинес ва Хесус Ривас Беркни қизларининг ноҳақ ўлими, ноқонуний озодликдан маҳрум қилиш ва болаликдаги жинсий зўравонликда айбламоқда.
Суд ҳужжатларига кўра, Берк ва Эрнандес илк бор 2023 йил ноябрь ойида, қиз 13 ёшда бўлганида учрашишган.
Уларнинг сўзларига кўра, кейинги 16 ой давомида икковлон 10 000 га яқин матнли хабар алмашган ва бир неча бор жинсий алоқада бўлган.
«Барча тегишли вақтларда Берк вояга етмаган марҳума устидан ваколатли мавқега эга бўлган катта ёшли шахс эди ва унга нисбатан ноўрин таъсир ва назорат ўтказа олган ва ўтказган», дейилади ота-она ўтган жума куни топширган ҳужжатларда.
Шунингдек, улар Берк ўсмир қизни Голливуд Ҳиллздаги уйида, қиз уларнинг муносабатларини ошкор қилиш билан таҳдид қилганидан кейин ўлдирганини даъво қилишмоқда. Бунга гўёки юборилган: «Мен сенинг карьерангга ҳам, ҳаётингга ҳам чек қўяман» деган хабар сабаб бўлган.
Даъво аризасида Беркнинг бир нечта компаниялари ва менежерлари, шунингдек, унинг онаси ва бирга яшайдиган қўриқчиси ҳам кўрсатилган.
Эрнандеснинг ота-онаси бу шахслар «Беркга Ривас Эрнандесни ажратиб қўйишга имкон берганини» ва унинг саёҳати, уй-жойи ва хавфсизлигига ёрдам берганини айтмоқда.
Беркнинг Mogul Vision менежмент компанияси ва молиявий менежери бундан аввал Берк ва Ривас Эрнандес ҳақида билганликларини инкор этишган эди.
Июль ойида судья жиноят иши бўйича Беркнинг қотиллик айблови билан судланиши учун етарли асослар мавжуд деб топди. Ўша пайтда округ прокурори ўлим жазосини талаб қилиш масаласини кўриб чиқаётганини айтган эди.
Душанба куни, Эрнандеснинг 16 ёшга тўлган бўлиши керак бўлган кунда, унинг оиласи баёнот бериб, Беркни қатл этишга чақирди.
«Агар ўлим жазоси қўлланилса, бу бизнинг қизимизга, оиламизга ва қимматли қизимизни қўллаб-қувватлаётган дунёга фақат азоб келтирган, туйғулардан маҳрум, ичи бўш ва виждонсиз бундай мавжудот учун айни муддао бўларди», дейилади оила адвокати орқали тарқатилган баёнотда.
Берк ўтган ҳафта айбловлар бўйича яна ўзини айбдор деб тан олмади ва шундан сўнг ўзининг машҳур ҳимоячи адвокати билан алоқани узди. Ҳозирда уни жамоат ҳимоячиси вакиллик қилмоқда ва у 19 октябрда судга қайтиши керак. Уни суд қилиш кейинги йилга қолдирилди.
Жамоат ҳимоячиси ўринбосари Валид Кандеел Берк «унинг шароитларини жиддий қабул қиладиган ва далилларни синчиклаб ўрганадиган ҳимояга ҳақли» эканини айтди.
«Биз унга ана шундай ҳимояни тақдим этишга содиқмиз», деди у.
Унинг идораси фуқаролик даъвоси бўйича дарҳол изоҳ бермади.