Ўлатга қарши институт ходими вафотидан кейин Иркуцк касалхоналарида карантин жорий этилди
Роспотребнадзор унинг ўлимига пневмония сабаб бўлгани, эпидемиологик вазият – «барқарор»лигини таъкидламоқда.
Ўлатга қарши институт ходими вафотидан сўнг Иркуцк касалхоналарида карантин жорий қилинди
«Люди Байкала» нашри 4-октабр куни Иркуцкдаги бир нечта шифохонада уч ҳафталик карантин бошланганини маълум қилди. Журналистлар берган маълумотга кўра, шаҳардаги 1-, 3-, 10-сонли клиник шифохоналар ҳамда Ивано-Матренинская болалар шифохонаси ёпилган. Бундан ташқари, шу кунларда фарзанд кутаётган оилалардан бири нашрга Иркуцкдаги туғуруқхоналардан бирида ҳам карантин жорий этилганини айтган.
Нашрнинг соғлиқни сақлаш соҳасидаги суҳбатдоши сўзларига кўра, иркуцклик шифокорлар «аллақачон ўлат тўғрисида очиқчасига гапирмоқда», бироқ шифохоналарга келиб тушаётган ҳужжатларда бу ташхис қайд этилмаган. «Ўпка ўлати тарқалганда танлаб карантин қўлланмайди – чекловлар барча тиббиёт муассасаларида бир вақтнинг ўзида жорий этилади», - дея «Люди Байкала» ўз манбаси сўзларини келтиради.
«Люди Байкала» хабаридан кўп ўтмай Роспотребнадзор баёнот берди. Идора «Иркуцк области, Иркуцк ва Шелехов шаҳарларида санитария-эпидемиологик вазият барқарорлиги»ни маълум қилди ҳамда «махсус комплекс чора-тадбирлар» ташкил этилгани ва ўтказилгани ҳақида ҳисобот берди.
Бундай чоралар Иркуцкдаги ўлатга қарши институт ходими «этиологияси аниқланмаган пневмония»га чалингани сабабли кўрилган. Роспотребнадзордагилар вафот этган аёл организмида «унинг касбий фаолияти билан боғлиқ микроорганизмлар» топилмаганини алоҳида таъкидлаган.
3-октабр куни Шелеховдаги Иркуцк алюминий заводида ниқоб режими жорий этилганди. Завод директори Артём Фомин буни профилактик чора деб атаган. «Ўзини асраганни Худо ҳам асрайди – эҳтиёткорлик чораларига риоя қилинг», – деб ёзган у ўз телеграм-каналида.
Бир неча кун аввал айнан Шелеховдаги (Иркуцкнинг йўлдош шаҳри) шифохоналардан бирида 28 ёшли бемор Даря Шипилова вафот этганди (журналистлар аниқлашича, у ўлатга қарши институтда лаборантка бўлиб ишлаган). Уни шифохонага 29-сентабр куни олиб келишган, икки кун ўтиб унинг жони узилган. Ўшанда ОАВда юз берган ҳодиса бўйича икки версия тилга олинганди.
Улардан бирига кўра, Шипилова Таиланддан қайтганидан кейин ўпка ўлати ташхиси билан касалхонага тушиб қолган. Бошқа версияга кўра, у қўққисдан ўлат қўзғатувчи солинган пробиркани синдириб қўйган. Роспотребнадзор эса институтда патоген микроорганизмлар билан боғлиқ фавқулодда ҳолат рўй бермаганини билдирган.
Шу билан бирга, Иркуцк области расмийлари беморнинг ўлими, шунингдек, унинг ўлат билан касаллангани эҳтимоли ҳақида баёнот бермаган. Губернатор Игор Кобзев 2-октабр куни Россиянинг бош санитария врачи Анна Попова (у шахсан Иркуцкка учиб келган) билан йиғилиш ўтказганини маълум қилди ва бунга «регионда яшовчи фуқаро ўта хавфли инфексия билан касаллангани ҳақида тарқалган маълумот» сабаб бўлганини айтди.