Ўғил 11 сентябрь ҳужумларида ҳалок бўлган отаси хотирасини ёд этди
Роб Ҳаллиганнинг отаси Нью-Йоркдаги Бутунжаҳон савдо марказининг Эгизак минораларидан бирида ишлаётган эди.
**Ўғил 11 сентябрь ҳужумларида ҳалок бўлган отаси хотирасини ёд этмоқда**
Роб Ҳаллиганнинг Нью-Йоркдаги Жаҳон савдо марказида ишлаган отаси Боб
Ковентрилик эркак АҚШдаги 11 сентябрь террорчилик ҳужумларида ҳалок бўлган отасини ёдга олмоқда.
Роб Ҳаллиганнинг отаси Боб 2001 йил 11 сентябрда олиб қочиб кетилган йўловчи самолёти бинога урилган пайтда Жаҳон савдо марказининг иккинчи (жанубий) минораси 99-қаватида бўлган.
«Ал-Қоида» террорчилари томонидан тўртта йўловчи самолёти эгаллаб олинганидан кейин содир этилган ҳужумларда 3000 га яқин одам, жумладан 67 нафар Британия фуқароси ҳалок бўлди. Самолётлардан иккитаси Эгизак минораларга бориб урилган.
«Отамнинг у ерда бўлган-бўлмаганини билиш учун узоқ вақт керак бўлди. Ҳеч қандай хабар бўлмаганда умид қиласиз, лекин бир неча кундан кейин: "У тирик чиқолмаган бўлса керак", деб ўйлай бошлайсиз», деди Роб.
Роб ҳужумлардан бир ҳафта ўтиб Нью-Йоркка борди ва отаси юрган йўналиш бўйлаб Нью-Жерсидан Манҳэттенга поездда йўл олди.
Унинг отаси Боб 1980-йилларда Америкага кўчиб ўтган эди.
«Шаҳарнинг ўзи жуда ғалати эди, у тўхтаб қолмаганди, лекин секинлашганди — одамлар шошилмасди ва ҳамма жойда чанг қатлами бор эди», деди у BBC CWR телеканалига.
«Ўша пайтда мени ҳайратда қолдирган нарса нотаниш одамларнинг меҳрибонлиги бўлди. У ерда бошқаларнинг аҳволи яхши эканига ишонч ҳосил қилишни хоҳлайдиган жуда кўп одамлар бор эди ва бу менга жуда қаттиқ таъсир қилди».
Роб отаси хотирасига бағишланган шоу яратди
Мусиқачи бўлган Роб ўз бошидан кечирганларини ҳужумлардан 25 йил ўтиб, отаси хотирасини ёд этувчи «Биз бу ерга қандай келиб қолдик» (How Did We Get Here) деб номланган шоуга айлантирди.
Робнинг айтишича, бу «нима содир бўлгани ва биз бу ерга қандай келиб қолганимиз ҳақида ҳикоя қилувчи» «махсус» концертдир.
«Менда "муҳаббат буюкдир" деган шиор бор, мен уни одамларга етказишга ҳаракат қиламан — биз бу дунёдаги тартибсизликлардан устунроқ бўла оламиз», дея қўшимча қилди у.
Концерт шанба куни Стратфорд-апон-Эйвон яқинидаги Шоттери шаҳрида жойлашган Сент-Эндрю черковида бўлиб ўтади.