Nvidia томонидан қўллаб-қувватланадиган сунъий интеллект маълумотлар маркази компанияси йирик фонд бозорига чиқиш режасидан воз кечди
Firmus бу қарорга «бозордаги сўнгги ўзгарувчанлик ва ҳукм сураётган бозор шароитлари» сабабли келганини маълум қилди
Nvidia томонидан қўллаб-қувватланадиган сунъий интеллект (СИ) маълумотлар маркази компанияси йирик фонд бозорига чиқиш режасидан воз кечди
Сунъий интеллект (СИ) маълумотлар марказлари билан шуғулланувчи Firmus компанияси Австралия тарихидаги энг йирик фонд бозори рўйхатидан ўтиш (листинг) режаларини бекор қилди.
Nvidia томонидан қўллаб-қувватланадиган компания ушбу қарорни «бозордаги сўнгги ўзгарувчанлик ва ҳукм сураётган бозор шароитлари» туфайли қабул қилганини билдириб, оммавий бозорга чиқиш компания ёки унинг акциядорлари манфаатларига мос келмаслигини қўшимча қилди.
Firmus дастлаб фонд бозоридаги дебюти орқали компания қийматини 30 миллиард доллардан (22,65 миллиард фунт стерлинг) кўпроққа баҳолашни режалаштирган эди.
Инвестиция фирмаларидан бири BBC’га баҳолаш билан боғлиқ хавотирлар туфайли дастлабки оммавий таклифда (IPO) иштирок этмасликка қарор қилганини айтди.
«Firmus энди хусусий бозорлардан капитал жалб қилишга интилади ва муқобил оммавий ҳамда хусусий бозор имкониятларини кўриб чиқади. Ушбу имкониятлар ривожланиши билан акциядорларга қўшимча маълумот тақдим этамиз», — деди компания.
Firmus OpenAI ва Meta каби мижозлар учун суюқлик билан совутиладиган маълумотлар марказларини қуради ва бошқаради, уларни компания «СИ фабрикалари» деб таърифлайди.
У Австралия, Сингапур ва Осиё-Тинч океани минтақасининг бошқа ҳудудларида фаолият юритади.
Компания инвесторлари қаторига Nvidia ҳамда Blackstone ва Jane Street каби йирик инвестиция фирмалари киради.
Blackstone BBC мурожаатига изоҳ беришни рад этди.
Nvidia ва Jane Street компанияларига ҳам изоҳ олиш учун мурожаат қилинган.
Firmus компаниясининг фонд бозорига чиқишдан воз кечиш қарори инвесторлар ва соҳа таҳлилчиларининг СИ соҳасига юзлаб миллиард доллар инвестиция қилинаётгани, аммо узоқ муддатли даромад истиқболлари ноаниқ бўлиб қолаётгани ҳақидаги хавотирлари фонида юз берди.
Австралиянинг энг йирик пенсия жамғармаларидан бири бўлган UniSuper ҳам IPO’да иштирок этмасликка қарор қилган институционал инвесторлар қаторида бўлди.
«Бизнингча, Firmus ҳақиқатан ҳам жозибадор тарихга эга. Фақат унинг баҳоланиши жозибадор эмас», — деди UniSuper инвестициялар бўйича бош директори Жон Пирс инвесторлар учун берган баёнотида.
У шунингдек, UniSuper компанияси Firmus ўз ўсиш режаларини молиялаштириш учун кўпроқ қарз олиши кераклигидан хавотирда эканини айтди.
«Бу ачинарли. [Австралия қимматли қоғозлар биржаси] янги тарихларга муҳтож ва агар тўғри нарх белгиланганида, бу улардан бири бўлиши мумкин эди», — деди Пирс BBC’га.
Сентябрь ойида OpenAI бош ижрочи директори Сэм Альтман технология хавфсизлиги билан боғлиқ хавотирларни рўкач қилиб, унинг компанияси бу йил фонд бозорига чиқишни режалаштирмаётганини, бу оммавий бозорга чиқиш учун «ноўрин вақт» эканини айтган эди.
ChatGPT яратувчиси ва унинг рақобатчиси Anthropic компаниялари ўз қийматини 1 триллион доллардан ортиқ деб баҳолайдиган йирик фонд бозори дебютларини кўриб чиқмоқда.
Пайшанба куни АҚШ савдоларида СИ билан боғлиқ бўлган Nvidia ва Oracle акциялари OpenAI даромадлари кутилганидан пастроқ бўлгани ҳақидаги хабарлардан кейин пасайди.