Новороссийскда нефт ортилган танкерга дрон зарба берди
Грек компанияси бошқарувидаги Скирос танкери Новороссийск яқинидаги Каспий қувур консорсиуми (КҚК) терминалида Россия нефтини юклаб олганидан сўнг дрон ҳужумига учради. Блоомберг маълумотига кўра, ҳодиса оқибатида жабрланганлар йўқ, атроф-муҳитга ҳам зарар етмаган.
Новороссийскда нефт ортилган танкерга дрон ҳужум қилди.
Блоомберг агентлигининг 17-августдаги хабарига кўра, Греция компанияси бошқарувидаги "Скирос" нефт танкери Қора денгизда, Новороссийск яқинида учувчисиз учиш аппарати ҳужумига учраган.
Маълумотларга кўра, ҳужумдан аввал танкер Каспий қувур консорсиумининг (КҚК) Новороссийск яқинидаги терминалида Россияда қазиб олинган нефтни юклаб олган. Ҳужум 16-август куни содир бўлган.
Блоомберг бу ҳодисани Россиянинг Украинага қарши уруши нефт ташиш йўналишларига таъсир кўрсатаётганининг яна бир далили сифатида баҳолади. Агентлик маълумотига кўра, КҚК терминали орқали жаҳон бозорига етказиб бериладиган нефт глобал таъминотнинг тахминан 2 фоизини ташкил этади.
КҚК терминали асосан Қозоғистонда қазиб олинган ва экспортга мўлжалланган нефтни юклаш учун ишлатилади. Бироқ манбанинг таъкидлашича, дрон ҳужумига учраган "Скирос" танкерига айнан Россияда қазиб олинган хомашё юкланган. "Скирос" бир вақтнинг ўзида 1 миллион баррелгача нефт ташиш имкониятига эга. Блоомберг ҳисоб-китобларига кўра, КҚК терминали орқали экспорт қилинадиган умумий нефт ҳажмининг 5-10 фоизи Россия нефти ҳиссасига тўғри келади.
"Скирос" танкери билан боғлиқ ҳодиса КҚК терминали ҳудудида сўнгги уч ҳафта ичида қайд этилган биринчи дрон ҳужуми эмас. Июл ойида терминалга бир неча бор дронлар билан зарба берилган ва бу унинг фаолиятида узилишларга олиб келган эди. КҚК Қозоғистон нефтини жаҳон бозорига етказиб беришда муҳим аҳамиятга эга бўлгани сабабли, терминал ишидаги муаммолар Қозоғистондаги айрим конларда нефт қазиб олиш ҳажмини қисқартиришга ҳам олиб келган.
Июл охирида Каспий қувур консорсиуми хавфсизликка таҳдидни камайтириш ҳамда эҳтимолий нефт тўкилиши оқибатида атроф-муҳитга зарар етишининг олдини олиш мақсадида терминал фаолиятини вақтинча тўхтатиш имкониятини ҳам кўриб чиққан. Бироқ якунда КҚК ишни давом эттиришга қарор қилган.
Танкерни бошқараётган Греция компаниясининг билдиришича, "Скирос"га қилинган ҳужум оқибатида экипаж аъзоларидан ҳеч ким жабрланмаган. Нефт сизиб чиқиши ёки атроф-муҳит ифлосланиши ҳам қайд этилмаган. Компания ҳодиса тафсилотлари бўйича қўшимча изоҳ бермаган.
Ҳодиса АҚШ Украинадан КҚК инфратузилмасига ҳужум қилмасликни сўрагани ҳақида хабарлар тарқалганидан бир неча кун ўтиб содир бўлди. Финансиал Тимес 12-август куни манбасига таяниб хабар беришича, АҚШ вице-президенти Жей Ди Венс Украина президенти Володимир Зеленскийдан Каспий қувур консорсиуми инфратузилмаси ва Новороссийск портига кирадиган танкерларга зарба беришдан тийилишни сўраган. Нашр маълумотига кўра, Киев КҚК инфратузилмаси ҳамда Россиядан ташқарида рўйхатдан ўтган кемаларга ҳужум қилмасликка рози бўлган. Бироқ бунинг учун бундай кемалар Украина санксияларига тушмаган ва Россия юкларини ташимаётган бўлиши шартлиги айтилган. "Скирос" танкери эса, Блоомберг маълумотига кўра, ҳужумдан олдин айнан Россия нефтини юклаб олган.