Ноутбукни ушлаб қолмоқчи бўлган. Ал-Беруний номидаги мактаб маъмурияти ўқувчининг ўлими тафсилотларини очиқлади
Ноутбукни ушлаб қолмоқчи бўлган. Ал-Беруний номидаги мактаб маъмурияти ўқувчининг вафоти тафсилотларини очиқлади
Ал-Беруний номидаги халқаро мактаб-интернатда 5 сентябрь куни ётоқхонанинг тўртинчи қавати деразасидан тушиб кетган 10-синф ўқувчиси билан боғлиқ ҳодиса тафсилотлари маълум қилинди. Маъмурият талқинига кўра, ўсмир деразадан тасодифан тушиб кетган ноутбукни ушлаб қолмоқчи бўлган, мувозанатни йўқотиб, пастга йиқилган.
Бахтсиз ҳодиса 5 сентябрь куни тахминан соат 15:10 да интернат тарбияланувчилари яшайдиган ётоқхонада юз берган. Ўсмир тўртинчи қаватдаги хонасида бўлган ва дераза олдида ноутбукда ишлаётган эди. Қурилма ташқарига тушиб кетганда, у уни ушлаб қолмоқчи бўлган, мувозанатни йўқотиб, пастга қулаган.
Воқеа жойига зудлик билан тез ёрдам чақирилган ва ота-онаси хабардор қилинган. Аввалига ўсмир Тошкент тиббиёт академиясининг кўп тармоқли клиникасига олиб борилган, сўнгра Республика шошилинч тиббий ёрдам илмий марказига ўтказилган.
Йигитда умуртқа поғонаси синиши, оёқ кафти соҳасидаги суяк синиши, шунингдек, кўкрак қафаси сиқилиши туфайли юзага келган ўпка гематомаси аниқланган. Интернатдан маълум қилишларича, унга операция белгиланмаган: ўсмирга зарур тиббий ёрдам кўрсатилган ва овқатланиши таъминланган.
Ўн кундан кейин, 15 сентябрь куни эрталаб, ўқувчининг отаси интернат ижрочи директорига унинг вафот этганини маълум қилган. Шундан сўнг ҳуқуқ-тартибот идоралари ҳалок бўлган боланинг ота-онаси ва таълим муассасаси раҳбаридан тушунтириш хатлари олган. Интернат томонидан тақдим этилган маълумотларга кўра, ушбу тушунтиришларда улар бир-бирларига нисбатан даъволари йўқлигини кўрсатишган.
Ўлим сабабини аниқлаш учун суд-тиббий экспертизаси тайинланган. У якунлангач, ўсмир Наманган туманига олиб борилган ва у ерда 15 сентябрь куни дафн маросими бўлиб ўтган.
Интернатда ҳалок бўлган бола мактабнинг энг яхши ўқувчиларидан бири бўлгани таъкидланди. У математика бўйича республика ва халқаро олимпиадаларда совринли ўринларни эгаллаган, яхши ўқиган ҳамда синфдошлари ва педагоглар ўртасида ҳурматга сазовор бўлган.
Аввалроқ Бош прокуратура Podrobno.uz мухбирига ўқувчининг ўлими ҳолати бўйича терговга қадар текширув ўтказилаётганини маълум қилган эди.