Норвегияда янги қирол қасамёд қилди
Норвегияда янги қирол Ҳаакон ВИИИ 1-сентябр куни пойтахт Ослодаги парламентда мамлакат конституциясига содиқлик қасамёдини қабул қилди. У ўтган ҳафтада вафот этган отаси Ҳаралд В ўрнини эгаллади. Бу ҳақда Деуцче Велле хабар берди.
31-август куни қирол Ҳаралднинг тобути қироллик саройи черковига келтирилган эди. Фуқаролар 9-сентябрдаги дафн маросимигача марҳум қирол билан хайрлашиши мумкин.
Маросим Ослодаги Стортинг, яъни парламентда бўлиб ўтди. Парламент спикери Масуд Гарахани Ҳаралднинг вафоти ва Ҳааконнинг тахтга ўтириши ҳақидаги расмий эълонни ўқиб эшиттирди. Шундан сўнг янги конституцион монарх қасамёд келтирди.
“Мен Норвегия Қироллигини унинг Конституцияси ва қонунларига мувофиқ бошқаришга ваъда бераман ва қасамёд қиламан. Менга қодир ва барчасини билгувчи Худо мададкор бўлсин”, деди 53 ёшли монарх.
**Қиролича Метте-Марит маросимда қатнашмади**
Маросим олдидан сарой администрацияси қиролнинг рафиқаси қиролича Метте-Марит унда иштирок этмаслигини билдирди. У қиролича унвонини олганидан бери 31-август куни биринчи марта жамоатчиликка кўриниш берган эди. Лекин у июн ойидаги ўпка кўчириб ўтказиш операциясидан кейин ҳали тикланмоқда.
Сарой баёнотига кўра, аъзо кўчириб ўтказилгандан кейин асоратлар юзага келиши тез-тез учраб туради. Метте-Маритда ҳам бундай ҳолат бир неча бор, жумладан, 1-сентябр куни ҳам кузатилган.
“Шу сабабли қиролича кун давомида шифокорлар назоратида бўлиши керак. Афсуски, бунинг ортидан қиролича бугун Стортингдаги қасамёд маросимида қатнаша олмайди”, деди қироллик шифокори.
**Рамзий монархиянинг роли қандай?**
Норвегия қироллик оиласининг илдизлари ИХ асрга бориб тақалади. Мамлакат 1905-йилда Швециядан ўз мустақиллигини қайтариб олган эди. Ўшанда ўтказилган умумхалқ овоз беришида сайловчиларнинг тўртдан уч қисми рамзий конституциявий монархияни тиклаш ғоясини қўллаб-қувватлаган.
Асосий сиёсий ҳокимият сайланадиган ҳукумат ва парламент қўлида жамланган. Бироқ Норвегия қироллик оиласи вакиллари дипломатияда ва мамлакатни дунёга танитишда “юмшоқ куч” ролини сақлаб қолган.