Норвегия дунёда биринчи бўлиб жамоат жойларида СИ-кўзойнакни тақиқлашни таклиф қилди
Норвегия сунъий интеллектли кўзойнакларни жамоат жойларида тақиб юришни вақтинча тақиқламоқчи. Ҳукумат бундай қурилмалар одамларни уларнинг хабарисиз суратга, видеога ёки аудиога ёзиб олиш имконини бериши махфийликка таҳдид солаётганидан хавотирда.
Норвегия жамоат жойларида СИ-кўзойнакни тақиқлашни таклиф қилган дунёдаги биринчи давлат бўлди
Норвегия ҳукумати хиёбонлар, соҳиллар, мактаблар, болалар боғчалари ва шифохоналар каби жамоат жойларида сунъий интеллектга эга кўзойнакларни тақиб юришни вақтинча тақиқлашни режалаштирмоқда.
ФТ нашрининг ёзишича, ҳукумат 5-октабр куни тегишли қонун лойиҳаси тайёрланаётганини маълум қилган. У яқин кунларда парламентга киритилиши кутилмоқда.
«Одамлар бехабар суратга олиниши, видеога туширилиши ёки овози ёзиб олиниши хавфини туғдирувчи янги қудратли технологиянинг жорий этилиши хавотир уйғотмоқда», - деди Норвегия рақамлаштириш ва давлат бошқаруви вазири Торгейр Микаелсен.
Унинг айтишича, вақтинчалик тақиқ вазиятни чуқур ўрганиш ва доимий қоидаларни ишлаб чиқиш учун керак.
Норвегия ҳукумати сунъий интеллектли кўзойнакларни бутунлай тақиқлаш ҳақида гап кетмаётганини таъкидлади.
ФТ қайд этишича, Норвегия сунъий интеллектли кўзойнаклардан фойдаланишга чекловларни бутун мамлакат бўйлаб жорий этишга қарор қилган дунёдаги биринчи йирик давлат ҳисобланади.
Бошқа даражаларда Норвегияда бундай қурилмалардан фойдаланиш аллақачон тақиқланган, жумладан, Ослодаги мактабларда ҳамда Эқуинор нефт-газ корпорацияси обьектларида. Шунга ўхшаш тақиқлар бошқа давлатларда ҳам мавжуд. Хусусан, Мета компаниясининг сунъий интеллектли кўзойнаклари билан Англия ва Уелс судларига кириш тақиқланган.