Норвегия 2027-йилда Украинага 9,2 млрд доллар молиявий ёрдам ажратади

Норвегия 2027-йилга қадар Украинага 9,2 миллиард доллар миқдорида молиявий кўмак беришни режалаштирмоқда.

Норвегия ҳукумати 2027-молия йилида Украинага 85 миллиард Норвегия кронаси, яъни қарийб 9,2 миллиард АҚШ доллари миқдорида молиявий ёрдам ажратишни кўзда тутмоқда. Бу маблағ 2026-йилда ажратилган ёрдам миқдорига тенгдир. Бу ҳақда Реутерс агентлиги хабар берди.

Норвегия бош вазири Ёнас Гар Стёре Шимолий ва Болтиқбўйи давлатлари раҳбарлари билан биргаликда якшанба куни Украинага ташриф буюриб, Россия билан давом этаётган урушда Киевни қўллаб-қувватлашларини тасдиқладилар.

Стёре ҳукумат томонидан эълон қилинган нутқида Норвегиянинг Украинага ажратадиган маблағлари ҳарбий ва гуманитар эҳтиёжларни қоплашга йўналтирилишини таъкидлади.

"Украинани қўллаб-қувватлаш ва уни қайта тиклаш шунчаки ёрдам эмас. Бу Европанинг ўз хавфсизлигига киритилган инвестициядир", — деди Норвегия бош вазири.

Шанба куни Россия президенти Владимир Путин Украинани Россия иқтисодий обьектларига зарбалар бериш орқали "Пандора қутисини очганликда" айблади.

Унинг сўзларига кўра, Москва бунга жавобан Украинанинг "энг нозик иқтисодий тармоқларига" зарбалар беради.

Айни пайтда Россия ва Украина бир-бирининг иқтисодий инфратузилмасини издан чиқаришга қаратилган дрон ҳужумларини кучайтирмоқда. Томонлар кўпинча фронт чизиғидан анча узоқда жойлашган нишонларга ҳам зарба бермоқда.

Россия томонидан бошланган уруш 4,5 йилга яқинлашар экан, жанг майдонидаги тўқнашувлар билан бир қаторда иқтисодий инфратузилмага қарши ҳужумлар ҳам авж олмоқда.

Россия ташқи ишлар вазири ўринбосари Сергей Рябков Москва Украина урушини якунлаш бўйича янги таклифларни эшитишга тайёр эканлигини билдирган эди.