Нишон туманида 2 500 гектар майдонда агролойиҳалар амалга оширилмоқда
Қашқадарё вилоятининг Нишон туманида ем-хашак экинлари ва уруғлик картошка етиштириш учун 2 500 гектар чўл ҳудуди ўзлаштирилмоқда.
Қашқадарё вилоятининг Нишон туманида илгари қишлоқ хўжалиги ишлари учун фойдаланилмаган 2 500 гектар майдонда йирик аграр лойиҳалар амалга оширилмоқда.
«Qashqadaryo – Agro Star» компанияси 1 330 гектарлик майдонда замонавий технологиялардан фойдаланган ҳолда чорвачилик учун ем-хашак экинлари етиштиришни йўлга қўйди.
Яна 300 гектар майдонни уруғлик картошка етиштиришга ихтисослашган «Bulung‘ur – Agro Star» компанияси ўзлаштирмоқда. Лойиҳа доирасида Нидерландиядан келтирилган беш турдаги элита уруғлар экилмоқда.
Ҳудудни суғориш учун Австриянинг BAUER компанияси томонидан ишлаб чиқарилган 10 та pivot айланма типидаги ёмғирлатиб суғориш қурилмаси ўрнатилди.
Агротехник ишлар хорижлик мутахассислар иштирокида ҳамда илмий ва технологик ёндашувни қўллаган ҳолда олиб борилмоқда. Ишлаб чиқаришни ташкил этишда тупроқ таркиби, унинг намлик даражаси ва иқлим шароитлари ҳисобга олинмоқда.
Лойиҳа доирасида 10 минг тонна ҳажмдаги сифатли уруғлик картошка захирасини шакллантириш режалаштирилган.