Николас Мадуронинг АҚШдаги ҳибсхонадан илк суратлари эълон қилинди

Николас Мадуронинг АҚШ қамоқхонасидан илк суратлари эълон қилинди

Венесуеланинг собиқ президенти Николас Мадуронинг АҚШдаги қамоқхона ичидан олинган дастлабки суратлари эълон қилинди. У январ ойида Венесуеладан олиб кетилганидан бери Ню-Ёркнинг Бруклин туманидаги федерал муассасада сақланмоқда. Бу ҳақда ал-Жазеера хабар берди.

Суратларда Мадуро кулранг спорт кийимида тасвирланган бўлиб, икки қўли билан "В" ишорасини кўрсатмоқда. Собиқ президентнинг ҳибсга олинганидан бери сезиларли даражада вазн йўқотгани кўринади.

Мадуро суратларни якшанба куни Х ва Телеграм саҳифаларида эълон қилди. У испан тилида шундай ёзган: "Мен бу суратларни барча набираларимга, барча ўғил-қизларга ва бизни яхши кўрадиган барча яхши инсонларга кичик совға сифатида юборяпман".

Шунингдек, у қатъият билан туришини таъкидлаб, Яратганнинг йўл кўрсатишига ишонч билдирган. "Шуни билишингизни истайманки, биз қатъият билан турибмиз, қалбларимиз сизнинг меҳрингизга тўла. Биз кучли, хотиржам ва ишонч билан қоламиз. Яратган биз билан, у йўл кўрсатади. Венесуела яна юксалади", дея қўшимча қилган Мадуро.

Суратлардаги вақт белгилари уларнинг 25-июн куни олинганини кўрсатади. Бу сана Венесуеланинг шимолида 6,5 мингдан ортиқ одамнинг ҳаётига зомин бўлган ва катта вайронагарчиликларни келтириб чиқарган 7,5 ва 7,2 магнитудали зилзилалар содир бўлган куннинг эртасига тўғри келади.

АФП агентлиги суратларнинг ҳақиқийлиги ва уларни эълон қилишга қамоқхона маъмурияти томонидан рухсат берилган-берилмаганини аниқлаш учун муассаса билан боғланишга уринган. Бироқ агентлик ҳозирча жавоб олмаган.

Мадуронинг ушбу хабари унинг ўрнига вақтинчалик президент сифатида келган Делси Родригес АҚШ билан тарихий нефт келишувига эришилганини маълум қилганидан икки кун ўтиб эълон қилинди. Келишув АҚШ компанияларига Венесуеладаги нефт конларида фаолият юритиш имконини беради.

Собиқ президент ҳибсхонада газета ва интернетдан фойдалана олмайди. Бироқ унга оила аъзолари ва адвокатлари билан телефон орқали ойига тахминан 300 дақиқа гаплашишга рухсат берилган. Бир қўнғироқ 15 дақиқадан ошмаслиги керак.

Мадуро ва унинг рафиқаси Силиа Флорес АҚШда гиёҳванд моддалар савдоси ҳамда қурол сақлашда айбланмоқда. Улар мазкур айбловларни рад этмоқда. АҚШ федерал суди маълумотларига кўра, Мадуро ва Флореснинг суд жараёни 2027-йил 1-июнда бошланиши кутилмоқда.