Нигериядаги масжидда намозхонлар ўғирлаб кетилди

Нигерияда масжидда намоз ўқиётганлар ўғирлаб кетилди

Нигерияда жума намози вақтида қуролланган шахслар масжидга бостириб кириб, бир нечта намозхонни ўғирлаб кетди. Бу ҳақда Реутерс агентлиги полиция матбуот котиби Васиу Абиодунга таяниб хабар берди.

Маълумотларга кўра, ушбу ҳодиса 21-август куни Нигер штатида содир бўлган. Қуролланган гуруҳ аввал Гидан-Зана ва Кпеня қишлоқларига ҳужум қилган. Шундан сўнг, маҳаллий вақт билан соат 14:00 атрофида Декара туманидаги Кпеня масжидига бостириб кирган.

Абиодуннинг 22-августдаги баёнотида айтилишича, дастлабки ҳисоботларда қурбонлар йўқлиги кўрсатилган ва ҳозирда вазиятни баҳолаш ҳамда қутқарув ишларини олиб бориш учун ҳудудга қўшма хавфсизлик отряди юборилган.

Полиция ўғирлаб кетилганларнинг аниқ сонини маълум қила олмаган. Бироқ, маҳаллий аҳолининг Реутерс агентлигига билдиришича, 60 дан ортиқ намозхон ўғирлаб кетилган.

Нигериянинг шимоли-ғарбий ва шимолий-марказий ҳудудларида пул талаб қилиш мақсадида оммавий одам ўғирлаш ҳолатлари тез-тез учраб туради. Бу ерда маҳаллий аҳоли "бандитлар" деб атайдиган қуролланган жиноий гуруҳлар қишлоқлар, мактаблар ва магистрал йўлларга мунтазам ҳужум қилади. Мисол учун, 3-август куни Нигериянинг Замфара штатида қуролланган шахслар қишлоқ ва ҳарбий базага ҳужум қилиб, камида 52 кишини, жумладан, болаларни ўғирлаб кетганди.