Нигерияда ўғирлаб кетилган 20 нафар битирувчидан иборат гуруҳ қутқарилди
Гуруҳ шу ой бошида жамоатчилик хизмати дастури учун саёҳат қилаётган вақтида ўғирлаб кетилган эди
Нигерияда ўғирлаб кетилган 20 нафар битирувчи қутқарилди
Полициянинг маълум қилишича, ўтган ҳафта Нигерия жануби-шарқида ўғирлаб кетилган 20 нафар ёшлардан иборат гуруҳ қутқарилган.
Битирувчилар 1 октябрь куни мамлакат жанубидаги Абия ва Аква-Ибом штатларида миллий жамоатчилик хизмати дастурида иштирок этиш учун йўлга чиққан вақтларида қўлга олинган эди.
Улар полиция томонидан бошқа хавфсизлик идоралари кўмагида озод қилинди.
Чоршанба куни полиция матбуот котиби Ани Иниеду ўз баёнотида гуруҳ узоқ давом этган қидирув-қутқарув операциясидан сўнг Имо штатидаги Амакохиа Уби ҳудудида қутқарилганини айтди. Гуруҳ аъзоларига ғамхўрлик кўрсатилмоқда ва улар тиббий кўрикдан ўтиш учун олиб кетилган.
Унинг сўзларига кўра, полиция, ҳарбийлар ва бошқа хавфсизлик идоралари разведка маълумотлари асосида ўрмонлар ва гумон қилинаётган яшириниш жойларида қидирув ишларини олиб борган, бироқ тўлов тўлангани ёки бирор киши ҳибсга олингани ҳақида маълумот бермади.
Ёшлар Нигериядаги аксарият университет битирувчилари учун мажбурий бўлган бир йиллик жамоатчилик хизмати дастури — Миллий ёшлар хизмати корпусида (NYSC) иштирок этаётган эди, унда одамлар мамлакатнинг турли ҳудудларига юборилади.
Қуролланган шахслар транспорт воситаларига ҳужум қилган вақтда, улар иккита автобусда мамлакат жануби-ғарбидаги Ойо штатининг Ибадан шаҳридан Абия ва Аква-Ибом штатларидаги NYSC йўналиш лагерларига катта шоссе орқали кетаётган бўлган.
Ушбу ҳодиса Жануби-Шарқдаги йўлларда хавфсизлик ва одам ўғирлаш билан боғлиқ хавотирларни янада кучайтирди.
Улар озод этилишидан олдин, ўғирлаб кетилганлардан бирининг отаси Омотошо Адевале BBC’га берган интервьюсида одам ўғирловчилар 50 миллион найра (37 680 доллар; 28 440 фунт стерлинг) миқдорида тўлов талаб қилганини, бунга унинг қурби етмаслигини айтган эди.
«Кўнглим жойида эмас. Уч кундан бери овқатланганим йўқ», деди у кўз ёшларини тия олмай.
Тўлов эвазига одам ўғирлаш Нигериядаги жиноий гуруҳлар ва қуролли тўдалар иштирок этадиган асосий хавфсизлик муаммоси ҳисобланади. Расмийлар ҳужум қилганларнинг шахси ҳақида ҳеч қандай маълумот бермаган.