Нетаняху Британияни “ядро қуролига эга биринчи Ислом Республикаси” деб атади
Исроил Бош вазири Бинямин Нетаняху Буюк Британияни "ядро қуролига эга бўлган биринчи Британия Ислом Республикаси" деб атади. Бу ҳақда Тҳе Гуардиан хабар берди.
Нетаняху Исроил армия радиосига берган интервюсида ушбу фикрларни билдириб, ўнг қанот кучларнинг Британиядаги мусулмон озчиликка нисбатан исломофобик қарашларини такрорлади.
У ярим аср аввал журналист Рендолф Черчилл, яъни собиқ бош вазир Уинстон Черчиллнинг ўғли Исроилни ижобий ёритганини эслаб, шундай деди: "Буни бугунги Британиядан, яъни Британия Ислом Республикаси деб аталаётган жойдан излаб кўринг-чи".
Бошловчи Нетаняхунинг сўзларига эътироз билдирмади, аксинча, у бош вазирдан Буюк Британияга нисбатан адолациз ёндашмаётганини сўраб, "Бутун Европа шундай эмасми?" дея савол берди. Нетаняху ўз фикрида қатъий туриб жавоб берди: "Ҳа, лекин биласизми, кимдир биринчи ядровий қуролга эга бўлган Ислом Республикаси бу Британия Ислом Республикаси бўлади деган эди".
Маълумот учун, расман Покистон Ислом Республикаси деб аталадиган Покистон 1990-йиллардан бери ядро қуролига эга.
Сўнгги ойларда Буюк Британия ва Исроил ўртасидаги муносабатлар, айниқса, Энди Бернхем Буюк Британия бош вазири лавозимига келганидан бери тобора таранглашиб бормоқда. У бош вазир бўлишидан сал аввал Лейбористлар партиясининг Исроилнинг Ғазодаги ҳарбий ҳаракатларига дастлабки муносабати учун узр сўраган эди. Бернхем партия тўғри йўл тутмаганини ва унинг раҳбарлигида яхшироқ ҳаракат қилиши кераклигини айтиб, Британиянинг Яқин Шарқ бўйича ёндашувида жиддий ўзгариш бўлишига ишора қилган. Июн ойида у Исроил ҳукуматига босим ўтказиш учун кўпроқ иш қилишини, жумладан, жисмоний ва юридик шахсларга нисбатан қўшимча санксиялар киритиш ҳамда ноқонуний аҳоли пунктлари билан маҳсулот савдосини тақиқлаш эҳтимоли борлигини маълум қилган.
АҚШ вице-президенти Жей Ди Венс 2024-йилги президентлик кампанияси пайтида Нетаняхунинг фикрларига ўхшаш баёнот берган эди. У Буюк Британия "ядро қуролига эга бўладиган биринчи ҳақиқий исломий мамлакат"га айланиши мумкинлигини айтган эди.
Лондон мери Содиқ Хон ҳам хориждаги ўнгчи етакчилар, жумладан, Доналд Трамп томонидан исломофобик ёлғонлар орқали сиёсий устунликка эришишга қаратилган ирқчилик ҳужумларининг тез-тез нишонига айланиб келган.
Исроил тарихидаги энг ўнгчи ҳукуматга раҳбарлик қилаётган Нетаняху анъанавий иттифоқчилардан узоқлашди. Шу билан бирга, у ўнгчи ултрамиллатчи арбоблар, жумладан, ўтмишда яҳудийларга қарши (антисемитик) қарашларга эга бўлган шахслар билан яқинлашди.
Бош вазир идораси Нетаняхунинг баёноти Исроил ҳукуматининг расмий позициясини акс эттирадими ёки йўқми, деган саволга жавоб бермади. Буюк Британия Ташқи ишлар, ҳамдўстлик ва ривожланиш вазирлиги ҳам ушбу масалага дарҳол муносабат билдирмади. Аввалроқ Нетаняху Трампнинг Ғазо бўйича режасини рад этган эди.