Нетаняҳу партияси сўровларда ортда қолмоқда - Трамп унга тўлиқ қўллов билдирди
АҚШ президенти Доналд Трамп Исроилдаги парламент сайловлари олдидан бош вазир Бинямин Нетаняҳуни «тўлиқ ва сўзсиз» қўллаб-қувватлашини билдирди. Айни пайтда сўровларда Нетаняҳунинг «Ликуд» партияси Гади Айзенкот бощилигидаги «Яшар»дан ортда қолмоқда.
Нетаняҳу партияси сўровларда ортда қолмоқда, Трамп эса унга тўлиқ қўллов билдирди
Исроил парламенти — Кнессетга сайловлар 27-октабрга белгиланган.
АҚШ президенти Нетаняҳуни қўллашини Эрон масаласидаги ҳамкорлик билан боғлади. Унинг айтишича, Исроилга бошқа раҳбар келадиган бўлса, Вашингтон Эронга мустақил равишда қарши туришга мажбур бўлади. Трамп бундай йўлни танлаш нияти йўқлигини таъкидлади.
Шунингдек, у Нетаняҳу ҳукумати билан бирга Эрон режимига ҳарбий ва молиявий зарба берилаётганини даъво қилди. Теҳрон ўз сиёсатини ўзгартирмаса, босим давом этишини билдирди.
Тҳе Жерусалем Пост эълон қилган сўров натижаларига кўра, «Ликуд» сайловда 19 та, Исроил армиясининг собиқ бош қўмондони Гади Айзенкотнинг «Яшар» партияси эса 22 та мандат олиши мумкин. Шунга қарамай, ҳукумат тарафдорлари ва мухолифат блокларининг умумий имкониятлари бир-бирига яқинлигича қолмоқда.
Кнессетда кўпчиликни тузиш учун 120 ўриндан камида 61 тасини бирлаштириш керак. Шу сабабли алоҳида партиянинг биринчи ўринни эгаллаши унинг ҳукумат тузишини автоматик тарзда кафолатламайди.
АП агентлигига кўра, эҳтимолий ссенарийлардан бири — мухолифатнинг сўл, марказчи ва ўнг партияларни бир коалицияга бирлаштиришга уриниши. Иккинчи вариант эса Нетаняҳу партиясининг ўта ўнг сиёсий кучлар билан иттифоқини давом эттиришидир.
Бундай вазиятда араб партиялари муҳим рол ўйнаши мумкин. Улар манфаатларини ифодалайдиган араб аҳоли мамлакатда овоз бериш ҳуқуқига эга фуқароларнинг тахминан 20 фоизини ташкил этади. Сўровларда араб партияларига 13–15 та мандат прогноз қилинмоқда.
Бироқ сиёсий кучлар ўртасидаги келишмовчиликлар коалиция тузишни қийинлаштириши мумкин. АП баҳосига кўра, агар ҳеч бир томон парламент кўпчилигини шакллантира олмаса, Исроилда сиёсий инқироз чўзилиши ва яна сайлов ўтказилиши эҳтимоли бор.