Непалдаги сел оқибатида 5 мингдан зиёд одам бедарак йўқолди
Қутқарув операцияси чоғида 13,8 мингга яқин киши қутқарилган. Камида 5285 киши ҳамон бедарак йўқолганлар рўйхатида қолмоқда.
Непалда сел сабаб 5 мингдан ортиқ одам бедарак йўқолди
Непал ҳукумати камида 1455 кишининг умрига зомин бўлган даҳшатли музлик кўчиши ва сув тошқинидан кейин бошланган қидирув-қутқарув амалиёти тугаганини маълум қилди.
Непал Фавқулодда вазиятлар бўйича миллий оператив маркази раҳбари Фаниндра Паудел агентликка «қидирув ва қутқарув босқичидан тиклаш босқичига» ўтилаётганини айтди.
Амалиёт давомида қарийб 13,8 минг киши қутқарилди. Камида 5285 киши ҳануз бедарак йўқолганлар рўйхатида турибди. Расмийга кўра, уларнинг оиласи ёки қариндошларига суғурта, банк ва бошқа ҳуқуқий расмиятчиликларни бажариш имконини бериш учун бедарак йўқолганларни расман вафот этган деб эълон қилиш масаласи аллақачон кўриб чиқилмоқда.
Табиий офатлар хавфини камайтириш миллий бошқармаси раҳбари Дҳарам Раж Упрети эса эҳтиёж туғилса, фавқулодда қутқарув ишлари олиб борилишини билдирди.
26-август куни Непалнинг Тибет билан чегарадош ҳудудида, Лангтанг-Лирунг тоғидаги музликнинг бир қисми кўчиб кетиши натижасида ҳалокатли сув тошқини юз берди. Ҳосил бўлган селлар Непалнинг олтита ҳудудида ва Хитойнинг Тибет мухтор раёнида вайронагарчиликларга сабаб бўлди. Натижада 12 та гидроелектр стансияси, йўллар, кўприклар, фермер хўжаликлари ва аҳоли пунктлари вайрон бўлди.
24-сентабр куни Непал бош вазири Балендра Шаҳ БМТ Бош Ассамблеясидаги нутқида мамлакат офат оқибатларини бартараф этиш учун халқаро ёрдам ҳажмини оширишга жуда муҳтож эканини билдирди. Ҳукумат маълумотига кўра, тикланиш харажатлари 4,78 миллиард долларга баҳоланмоқда, бу мамлакат ЯИМининг қарийб 12 фоизига тенг. Фақат энергетика обьектлари ва электр тармоқларини таъмирлаш учун 2,58 миллиард доллар керак бўлади. Непал ҳозирча бу маблағни қаердан топишни билмаяпти.