Непалдаги фожиадан 10 кун ўтиб, хитойлик эркак туннел ичидан тирик топилди

Непалдаги фожиадан 10 кун ўтиб, хитойлик эркак туннел ичидан тирик топилди

Непалда юз берган табиий офат туфайли туннел ичида қолиб кетган хитойлик фуқаро воқеадан 10 кун ўтиб қутқарилди. Непал армияси берган маълумотга кўра, Лу Ҳаитао 26-август куни юз берган тошқинлар сабаб Уппер Тришули-1 гидроелектр стансияси лойиҳасининг 225 метрлик туннелида қолиб кетган.

У табиий офат оқибатида туннелга қамалиб қолган ягона одам эмас эди. Тахминларга кўра, тошқинлар ва тупроқ кўчкиси пайтида юзлаб инсонлар туннелдан чиқишга улгурмаган. Лу Ҳаитао эса шундай ҳолатда тирик топилган учинчи шахсдир. Воқеадан бир неча кун олдин қутқарувчилар айнан шу дарёдаги Уппер Тришули 3А гидроелектр стансияси туннелидан яна икки кишини олиб чиққан эди.

Расмийлар Лу танасида кўзга ташланадиган оғир жароҳатлар аниқланмаганини айтишди. Унинг ҳаётий кўрсаткичлари барқарор бўлган. Бироқ хитойлик эркакда енгил гипотермия аломатлари қайд этилган. Шу сабабли Лу вертолётда ҳарбий госпиталга олиб кетилган.

26-август куни Ҳимолай ҳудудидаги улкан музлик қулаши ортидан кучли тошқин юзага келган. Непал табиий офатларни бошқариш идораси маълумотига кўра, мамлакатда камида 1 344 киши ҳалок бўлган, яна 4 887 киши бедарак йўқолган. Улар орасида 583 нафар хориж фуқароси бор.

Хитой давлат ахборот агентлиги Синхуа хабарига кўра, Тибетда ҳам табиий офат оқибатида 31 киши ҳалок бўлган, 531 киши бедарак йўқолган. Рўйхатда 261 нафар хориж фуқароси бор.

Шанба куни Непал армияси Чандика Кумари Шрестҳа исмли аёлни ҳам Бетраватидаги сув босган уйидан тирик ҳолда қутқарган. Ҳозирда қутқарувчилар туннелларда қолиб кетган бошқа одамларни излашда давом этмоқда.