Непалда сув тошқини: қидирув-қутқарув ишларига армия жалб қилинади
Непалнинг Хитой билан чегарадош Расува тоғли ҳудудида юз берган кучли сув тошқини оқибатида камида 157 киши ҳалок бўлди. Қарийб 400 киши бедарак йўқолган деб ҳисобланмоқда, улар орасида кўплаб хорижий сайёҳлар ҳам бор. Ҳудудда қидирув-қутқарув ишлари давом этмоқда.
Непалда юз берган сув тошқини оқибатида қидирув-қутқарув ишларига армия жалб этилмоқда. Непал полициясининг 26-августдаги маълумотларига кўра, ушбу табиий офат қурбонлари сони камида 157 нафарга етган.
Аввалроқ 384 киши, жумладан, 290 нафар хорижлик бедарак йўқолгани хабар қилинган эди. Кейинчалик Непал Туризм вазирлиги бедарак йўқолган хорижий фуқаролар сонини 341 нафар деб кўрсатди. Дпа агентлиги Непал Тоурисм миллий туризм ташкилотига таяниб хабар беришича, қутқарувчилар Германия, Испания, Нидерландия, АҚШ, Австралия, Буюк Британия ва бошқа давлатлардан келган сайёҳларни ҳам қидирмоқда. Бедарак йўқолган хорижий сайёҳларнинг энг катта қисмини Ҳиндистон фуқаролари ташкил этади.
Непал полицияси Хитойнинг Тибет ҳудуди билан чегарада бедарак йўқолганлар орасида 26 нафар полиция ходими ҳам борлигини маълум қилди. Расмийлар ҳалок бўлганлар ва жабрланганларнинг якуний сони, шунингдек, табиий офат етказган зарарнинг умумий кўлами кейинроқ аниқланишини билдирди.
Сув тошқинига айнан нима сабаб бўлгани ҳозирча аниқ эмас. Дпа маълумотига кўра, табиий офат музлик кўлининг тўсатдан ёрилиб кетиши натижасида келиб чиққан бўлиши эҳтимоли ҳам кўриб чиқилмоқда. Сув тошқини Тибетдан бошланиб, Непалнинг Багмати-Прадеш провинсияси орқали оқиб ўтувчи Бхоте-Коши дарёсида сув сатҳининг кескин кўтарилиши ортидан содир бўлган.
Дарё бўйида жойлашган аҳоли пунктлари, хусусан, Тимуре ва Сяпрубеси табиий офатдан энг кўп зарар кўрган ҳудудлар қаторида қайд этилган. Сув бозор ҳудудлари ва турар жойларни босган. Полиция бўлинмалари ва гидроенергетика обьектларига жиддий зарар етган, кўприклар ҳамда автомобил йўллари вайрон бўлган.
Ҳодиса жойида қидирув-қутқарув ишлари давом этмоқда. Қизил Хочнинг минтақавий бўлими Расува ҳудудига гуманитар юклар билан фавқулодда ёрдам гуруҳини юборган. Непал бош вазири Балендра Шох қутқарув операцияларига мамлакат армияси ва хавфсизлик хизматлари ҳам жалб қилинишини маълум қилди.
Табиий офат Хитой томонида ҳам оғир оқибатларга олиб келган. Хитойнинг "Синхуа" давлат ахборот агентлиги маълумотига кўра, 26-август куни эрталаб содир бўлган кўчкидан кейин Хитой жануби-ғарбидаги Гиронг округида жойлашган шу номдаги назорат-ўтказиш пунктида кўплаб ҳалок бўлганлар, жабрланганлар ва бедарак йўқолганлар қайд этилган.