Непалда кучли сув тошқинлари юз берди. 17 киши ҳалок бўлган, 400 дан ортиқ киши бедарак йўқолди (фото)
Непалда кучли сув тошқинлари оқибатида 17 киши ҳаётдан кўз юмди, 400 дан ортиқ киши эса бедарак йўқолди. Бу ҳақда Непал Невс нашри хабар берди.
Хитой билан чегарадош Расува туманида юз берган ушбу табиий офат натижасида 17 киши ҳалок бўлган, 400 нафардан зиёд киши эса топилмаяпти. Непал Туризм кенгашининг маълумотларига кўра, тошқин содир бўлган ҳудудларда бўлган 384 нафар сайёҳ ва саёҳатчи билан алоқа узилган. Уларнинг 291 нафари хорижлик фуқаролар бўлса, 93 нафари Непал фуқароларидир.
Хорижликлар орасида 105 нафар Ҳиндистон фуқароси борлиги айтилмоқда. Шунингдек, Австралия, Нидерландия, АҚШ, Малайзия, Россия, Буюк Британия ва Жанубий Африка фуқаролари ҳам бедарак йўқолганлар рўйхатида мавжуд. Ушбу рўйхат 10 та сайёҳлик компаниясидан олинган маълумотлар асосида тузилган бўлиб, Туризм кенгаши унинг дастлабки эканлигини ва айрим сайёҳлар алоқа тармоқлари ишламаётгани сабабли яқинлари билан боғлана олмаган бўлиши мумкинлигини таъкидлади.
"Уларнинг қаердалиги туристик компаниялар, гидлар, маҳаллий ҳокимият ва куч тузилмалари билан биргаликда аниқланмоқда", дейилади хабарда.
Тошқин 26-август куни эрталаб Бхоте-Коши дарёсида бошланган. Тибет томонидан келган кучли сув оқими дастлаб Тимуре ва Сябру-Беси аҳоли пунктларига, сўнгра Нувакот ва Дхадинг туманларига етиб борган. Сув уйлар, автомобиллар, йўллар ва кўприкларни оқизиб кетган.
Табиий офатнинг расмий сабаби ҳали тасдиқланмаган. Непал ташқи ишлар вазири Шишир Ханал зилзила ортидан юз берган кўчки дарё ўзанини тўсиб қўйган бўлиши мумкинлигини тахмин қилди. АҚШ Геология хизмати ҳам шу куни маҳаллий вақт билан соат 8:37 да ҳудудда 4,4 магнитудали зилзила содир бўлганини қайд этган.
Халқаро тоғ ҳудудларини комплекс ривожлантириш маркази мутахассисларининг фикрича, тош ва муз кўчкиси Лхенде дарёсини тўсиб, кейинчалик катта ҳажмдаги сувнинг бирдан оқиб чиқишига сабаб бўлган бўлиши мумкин. Музлик кўлининг ёрилгани ҳақидаги тахмин ҳам текширилмоқда.
Тошқин пайтида Тимуре, Сябру-Беси, Майлунг ва Расувагадхида хизмат қилган 26 нафар полициячи билан алоқа узилган.
"Бундан ташқари, қурилаётган 20 мегаватт қувватли Лангтанг-Хола ГЕСида ишлаган 60 дан ортиқ муҳандис ва ищининг қаердалиги номаълум. Улар сув келган вақтда туннелни бетонлаш билан шуғулланган", дейилади хабарда.
Табиий офат Непалнинг қарийб 430 мегаватт электр ишлаб чиқариш қувватига зарар етказган. Реутерс агентлигининг ёзишича, "бу мамлакат жами гидроенергетика қувватининг 12 фоизидан кўпроғини ташкил этади".
Юқори сув сатҳи ва йўлларнинг бузилгани қутқарув ишларини қийинлаштирмоқда. Қидирувга армия, полиция, вертолётлар ва дронлар жалб қилинган. Дарё бўйида яшовчи аҳоли баландроқ ва хавфсиз жойларга кўчирилмоқда.
Непал ҳукумати зарар кўрган ҳудудларни уч ой муддатга табиий офат инқирози зонаси деб эълон қилди. Жабрланганларни бепул даволаш, уйсиз қолганларни вақтинчалик бошпана билан таъминлаш ва ҳалок бўлганларнинг оилаларига моддий ёрдам бериш белгиланган.
Тошқин Хитойнинг Тибет ҳудудидаги Гиронг чегара портига ҳам зарар етказган. У ерда йўллар, электр ва алоқа тармоқлари узилган. Хитой раиси Си Сзинпин қидирув-қутқарув ишларини кучайтириш бўйича топшириқ берган.
2025-йилда ҳам Бхоте-Коши дарёсида тошқин юз бериб, тўққиз киши ҳалок бўлган ва 24 киши бедарак йўқолганди. Ўшанда Непал билан Хитойни боғловчи "Дўстлик кўприги" оқизиб кетилган. Кейинчалик тошқинга Тибетдаги музлик устида ҳосил бўлган кўлнинг ёрилиши сабаб бўлгани аниқланганди.