НБС: АҚШ Европадаги қўшинларининг қарийб ярмини олиб чиқиб кетиши мумкин
НБС: АҚШ Европадаги қўшинларининг қарийб ярмини олиб чиқиб кетиши мумкин
Пентагон Европадаги америкалик ҳарбийларнинг қарийб учдан бир қисмини олиб чиқиш имкониятини кўриб чиқмоқда, деб хабар берди НБС Невс. Телеканал етти нафар амалдаги ва собиқ АҚШ расмийлари ҳамда Ғарб амалдорларига таяниб ёзишича, Европадан 25 мингдан ортиқ америкалик ҳарбий ватанига қайтарилиши мумкин.
Журналистлар суҳбатлашган икки манбага кўра, қисқартириш бундан ҳам каттароқ бўлиши эҳтимолдан холи эмас — Европадан 40 минггача америкалик ҳарбий олиб чиқилиши мумкин. Бу АҚШнинг Европадаги ҳарбий контингентининг қарийб ярмига тенг.
АҚШ расмийлари ва ғарблик амалдорнинг айтишича, ҳарбийлар сонининг камайтирилиши, катта эҳтимол билан, Германия, Италия ва Испанияга таъсир қилади.
Европадаги Америка ҳарбий кучларининг асосий қисми айнан шу уч давлатда жойлашган. Шу билан бирга, бу мамлакатлар раҳбарлари Эрон билан боғлиқ уруш масаласида АҚШ президенти Доналд Трамп билан зиддиятга борганди.
АҚШнинг Европадаги ҳарбий иштирокини кескин қисқартириш режаси ҳарбий самолётлар, кемалар ва қурол-яроғларни ҳам олиб кетишни назарда тутади.
Агар режа амалга ошса, бу Совуқ уруш тугаганидан бери Европадаги 80 минг кишилик АҚШ ҳарбий контингентининг энг йирик қисқариши бўлади.
НБС Пентагондаги юқори мартабали расмий ва яна икки амалдорга таяниб ёзишича, бу масала бўйича ҳозирча ҳеч қандай қарор қабул қилинмаган.
Телеканал таъкидлашича, НАТОдаги иттифоқчилар Европада Россия агрессияси хавфи ортиб бораётгани ҳақида огоҳлантираётганига қарамай, АҚШ шундай кенг кўламли чораларни кўриб чиқмоқда.
Бу қадам АҚШнинг асосий иттифоқчилари билан муносабатларини кескин ўзгартириши ва Украина ҳамда Яқин Шарқдаги урушлар сабаб беқарорлик кучайган бир пайтда Европа давлатларини янги ҳамкорлар излашга мажбур қилиши мумкин.
Трампнинг иккинчи президентлик муддати бошланганидан бери у ва ёрдамчилари Европа ўз мудофаасини таъминлашда асосий масъулиятни ўз зиммасига олиши кераклигини таъкидлаб келади. Бунда Европани қўллаб-қувватловчи омил сифатида фақат АҚШнинг ядровий арсенали қолиши керак, деган қараш илгари сурилмоқда. Уларнинг фикрича, АҚШ асосий эътиборни Хитой, Эрон ва Ғарбий яримшардаги наркокартеллардан келаётган таҳдидлар билан курашишга қаратиши лозим.
Сўнгги ойларда Трамп Европадаги ҳамкорларини Эрон билан урушда АҚШга қўшилмагани учун кескин танқид қилди.
18-сентябр куни НАТО Бирлашган кучлари олий бош қўмондони ва АҚШ Европа қўмондонлиги раҳбари Алексус Гринкевич АҚШнинг Европадаги ҳарбий иштироки бўйича ўтказилган таҳлил натижаларини мудофаа вазири Пит Ҳегсетга тақдим этиши кутилмоқда.
Пентагон бундай таҳлил ўтказилаётгани ҳақида июн ойида маълум қилганди.
НБС Невс ҳисоб-китобига кўра, Гринкевич ҳисоботида тўртта эҳтимолий йўналиш кўриб чиқилади: АҚШ ҳарбий авиацияси, денгиз кучлари ва қуруқлик қўшинлари сонини қисқартириш, шунингдек бошқа турдаги куч ва воситаларни камайтириш ёки контингентнинг бир қисмини Европа ичида НАТОнинг шарқий қанотидаги давлатларга кўчириш.
АҚШнинг Европадаги қўшинларини қисқартиришга қарши бўлганлар бундай қадам НАТО иттифоқчиларини янада заифлаштириши, Россиянинг агрессив ҳаракатларини эса кучайтириши мумкинлигини таъкидламоқда.
Уларнинг фикрича, бу АҚШнинг бошқа қитъалардаги ҳамкорларига салбий таъсир қилади. Бундан ташқари, Америка армияси Яқин Шарқ ёки Африкага қўшинларни зудлик билан жўнатиш имконини берадиган муҳим логистика марказларидан айрилиши мумкин.
Ҳозир Германияда қарийб 36 минг, Италияда эса 12 мингга яқин америкалик ҳарбий бор. Испаниянинг жанубида эса АҚШ ҳарбий-ҳаво ва ҳарбий-денгиз кучларининг муҳим базалари жойлашган.