Навоийдаги Яйлов қишлоғида мактаб филиали очилди, у ерда ҳозир 3 ўқувчи ўқимоқда
Навоий вилоятидаги чекка Яйлов қишлоғида мактаб филиали очилди: 14 ўринли муассасада ҳозир 3 нафар бола таҳсил олмоқда. Газета 2025-йил ноябрида айнан шу қишлоқдан репортаж тайёрлаган, унда қишлоқда мактабдан ташқари, электр ва газ ҳам йўқлиги айтилганди. Бу таъминот ҳали ҳам етиб боргани йўқ.
Навоийдаги Яйлов қишлоғида мактаб филиали иш бошлади, ҳозир у ерда 3 ўқувчи таълим олмоқда
2026-йил 3-сентабрда Навоий вилоятининг Хатирчи ва Нурота туманлари оралиғида жойлашган, 60 дан ортиқ хўжалик истиқомат қиладиган Яйлов қишлоғида (аҳоли уни Жайлов ҳам дейди) узоқ кутилган мактаб филиали очилди. Бу тумандаги 52-мактабнинг филиали ҳисобланади.
Муассаса кириш қисмидан ташқари яна 1 хонадан иборат бўлиб, 14 ўринга мўлжалланган. Айни пайтда у ерда 3 нафар ўқувчи — бири биринчи, иккитаси учинчи синфда — таҳсил олмоқда. Уларга 3 нафар ўқитувчи барча фанлардан, жумладан рус ва инглиз тилларидан ҳам дарс беради.
Масаланинг моҳияти шундаки, Яйлов харитада Нурота тумани ҳудудида кўрсатилган бўлса-да, у ерда яшовчилар хатирчилик ҳисобланади. Шу вақтгача аҳоли ўз муаммоларини билдириш учун қайси туман ҳокимлигига бормасин, “Сиз яшайдиган жой Нуротага қарайди” ёки “Сиз Хатирчида рўйхатдан ўтгансиз” каби жавобларни эшитиб келганини айтади.
Газета мухбири Отабек Турдиев 2025-йил ноябрида айнан шу Яйлов қишлоғига бориб, репортаж тайёрлаб келган эди. Унда қишлоққа олиб борувчи йўлнинг ёмон аҳволи, газ, электр энергия ва мактаб йўқлиги ҳақида сўз борганди (у ерда ҳануз газ ва электр йўқ, одамлар бунинг ўрнига қуёш панелларидан фойдаланади — таҳр.).
Репортаж чоп этилиши билан Хатирчи ҳокими Умиджон Адизов Яйловга бориб, у ерда мактаб қурилиши ҳақида ваъда берган. Шунга кўра, мактаб 2025-йил охиригача қурилиб, фойдаланишга топширилиши керак эди.
Аммо кутилган мактаб қарийб бир йил ўтиб очилди.
Унгача ўқувчилар шу қишлоқдаги муаллим Баҳриддин Мустафоевнинг уйида таълим олишарди. Мустафоевнинг Газетаъга айтишича, қишлоқда 90-йилларда қурилган эски мактабда, айниқса қиш кунлари дарс ўтиш қийин бўлгани учун у қишлоқ болаларига ўз уйидан жой берган. Энди эса устознинг ўзи ҳар куни янги мактабга 3−4 км йўл босиб боради.
Мактабни электр билан таъминлаш учун 5 киловатли қуёш панеллари ўрнатилган, ичкарида болалар учун битта компютер ҳам ишламоқда. Тикув машинаси эса қишлоқдаги хотин-қизлар тикувчиликни ўрганиши учун берилган. Мактаб кутубхонаси учун 100 дона бадиий китоб ҳам тақдим этилган.
Баҳриддин Мустафоевнинг айтишича, Яйловдаги бошланғич синфдаги бошқа болалар учун мактаб ҳануз узоқ.
Бундан ташқари, уларнинг ота-оналари фарзандларини Нурота туманидаги ихтисослашган мактабларда ўқитишни маъқул кўради. Шунингдек, 15 нафарга яқин юқори синф ўқувчилари ҳам бошқа жойлардаги мактаб-интернатларда таҳсил олади.