НАТО ва АҚШ разведка марказлари жойлашган базага кирган икки киши ушланди
Буюк Британияда НАТО ва АҚШ разведка марказлари жойлашган Моулсворт ҳарбий базаси ҳудудига кирган икки нафар Латвия фуқароси ушланди. Полиция уларни мамлакат манфаатларига зарар етказиш мақсадида тақиқланган обьектга кирганликда гумон қилмоқда.
НАТО ва АҚШ разведка марказлари жойлашган базага кириб олган икки киши қўлга олинди
Ҳодиса 8-октабрга ўтар кечаси Кембрижшир графлигидаги РАФ Молесвортҳ базасида юз берган. Қўлга олинган эркаклар 32 ва 36 ёшда бўлиб, Буюк Британияда яшайди.
Полиция берган маълумотга кўра, хавфсизлик патрули аввал база яқинида ташлаб кетилган автомобилни аниқлаган. Кейин обьект атрофидаги тўсиқ шикастлангани маълум бўлган. Икки эркак база ҳудуди ичидан топилиб, ҳибсга олинган.
Улар дастлаб тақиқланган ҳудудга рухсациз кириш ва мулкка зарар етказиш гумони билан ушланган. Кейинроқ уларга нисбатан Буюк Британия манфаатларига зарар етказиш мақсадида тақиқланган обьектга кириш гумони бўйича ҳам чора кўрилган.
Ҳодисани терроризмга қарши кураш полицияси текширмоқда. Гумонланувчиларнинг аниқ мақсади тергов жараёнида аниқланмоқда.
Ферфорддаги ҳодиса билан боғлиқлик топилмади
Полиция ҳозирча ушбу воқеани сентабр охирида Ферфорд авиабазаси яқинида юз берган ҳодиса билан боғлаш учун асос йўқлигини билдирган.
Ўша пайтда маҳаллий аҳоли вакили база атрофидаги шубҳали ҳаракатлар ҳақида хабар берган. Полиция учта фургонни текшириб, улардан бензин топган. Ҳудуд ўраб олинган, яқин атрофдаги қишлоқ аҳолиси эса эвакуация қилинган.
Ферфорддаги ҳолат юзасидан етти нафар гумонланувчи ушланган, кейинчалик уларнинг барчаси муайян шартлар асосида озод қилинган.
Шундан сўнг АҚШ Ферфорд базасидаги Б-1 бомбардимончи самолётларини олиб чиқишга қарор қилган. Президент Доналд Трамп буни, унинг сўзларига кўра, Эрон билан боғлиқ шахслардан келаётган таҳдидлар билан изоҳлаган.