НАСАънинг Х-59 самолёти соатига 1 625 километрга чиқди
НАСАънинг Х-59 экспериментал товушдан тез самолёти бир ҳафтада олтита синов парвозини бажариб, ўз дастуридаги энг юқори натижани қайд этди. Парвозлардан бирида аппарат соатига тахминан 1 625 километр тезликка эришиб, шахсий тезлик рекордини ҳам янгилади.
НАСА'нинг Х-59 самолёти соатига 1 625 километр тезликка чиқди
НАСА маълумотига кўра, Х-59 самолёти 22, 24 ва 25-сентабр кунлари икки мартадан ҳавога кўтарилган. Шу билан бир ҳафтадаги парвозлар сони аввалги рекорддан иккитага ошган.
Ушбу сериядан сўнг самолётнинг жами синов парвозлари сони 38 тага етди.
Жадал синовлар Х-59'нинг парвоз имкониятларини босқичма-босқич кенгайтириш дастури доирасида олиб борилмоқда. Мутахассислар самолётнинг турли тезлик, баландлик ва манёврларда қандай ишлашини текширмоқда. Синов шароитлари аппарат келгусида ишлаши режалаштирилган режимларга яқинлаштирилмоқда.
Парвозлардан бирида Х-59 Мах 1,53 — соатига тахминан 1 625 километр тезликка эришган. Бу самолётнинг ҳозиргача қайд этилган энг юқори тезлигидир. Натижа унинг одатий парвозлари учун мўлжалланган Мах 1,4 крейсерлик тезлигидан ҳам юқори.
Х-59 НАСА'нинг Қуесст миссияси доирасида синовдан ўтказилмоқда. Лойиҳанинг мақсади — товушдан тез учишда ҳосил бўладиган кучли зарб товушини анча юмшоқ товушга айлантириш технологиясини намойиш этиш.
Кейинги босқичларда самолётнинг аҳоли яшайдиган ҳудудлар устидан парвозларига одамлар қандай муносабат билдириши ўрганилади. Тўпланган маълумотлар қуруқлик устидаги тижорий товушдан тез парвозларга оид шовқин меёрларини белгилашда фойдаланиш учун тақдим этилади.
Синовларга бой ҳафтадан сўнг Х-59 режали техник хизматга юборилган. Бу жараён тахминан уч ҳафта давом этиши кутилмоқда.
Техник хизмат якунлангач, мутахассислар самолёт тизимларини навбатдаги текширувдан ўтказади. Шундан кейин жамоа парвозларни тиклаш ва жадал синов дастурини давом эттиришни режалаштирган.