НАСА раҳбари Бойқўнғир космодромига ташриф буюрди

НАСА раҳбари Бойқўнғир космодромига ташриф буюрди

НАСА раҳбари Жаред Айзекман Қозоғистондаги Бойқўнғир космодромига келди. Бу ҳақда “Роскосмос” матбуот хизмати “РБК” нашрига маълум қилди.

Маълум қилинишича, НАСА раҳбарининг ушбу ташрифи сўнгги саккиз йил ичида биринчи марта амалга оширилмоқда. Жаред Айзекман Халқаро космик стансияга (ХКС) йўл оладиган “Союз МС-29” космик кемасини учириш маросимида иштирок этади. У шунингдек, халқаро экипажни кузатиш тадбирларида ҳам қатнашади ва “Роскосмос” давлат корпорацияси бош директори Дмитрий Баканов билан учрашув ўтказади.

Келажакдаги ҳамкорлик

Айзекман феврал ойида Россиянинг “Союз” космик кемасини учириш ниятида эканлигини билдирган эди. “Космик стансия ҳали узоқ вақт хизмат қилади. Келгуси йилларда биргаликда бажарадиган ишларимиз жуда кўп. Яхши суҳбатлар қуриш учун имкониятлар, албатта, кўп бўлади”, дея таъкидлаган эди у.

Шунингдек, НАСА раҳбари “Роскосмос” бош директори билан ҳар қандай масалада музокаралар олиб боришга тайёрлигини билдирди. Аввалроқ НАСА Ой ва Марсдаги ҳаёт симуляциясида бир йил яшаш учун тўрт нафар кўнгилли қидираётганини маълум қилганди.